Shefi i Bashkimit Evropian në Kosovë, Tomas Szunyog, është shprehur se Kuvendi i Kosovës ka humbur mundësinë që t’i ketë dy ligje të mira, duke thënë se dështoi t’i përfshinte rekomandimet e BE-së dhe të organizatave të tjera ndërkombëtare në Ligjin për Këshillin Prokurorial (KPK) dhe Ligjin për Këshillin e Pavarur të Mediave (KPM).
Szunyog ka shkruar se ligjet e mira nuk kanë të bëjnë vetëm me rrugën e Kosovës drejt BE-së, por edhe me “sigurimin e sundimit të ligjit, drejtësisë dhe mbrojtjes së qytetarëve”.
“Na vjen keq që Kuvendi nuk arriti t’i adresojë këto shqetësime kryesore dhe të përafrohet me standardet evropiane. Lidhur me projektligjin për zyrtarët publikë, i bëj thirrje Kuvendit që t’i rishqyrtojë edhe një herë amendamentet e propozuara për të siguruar që ai t’i përmbushë standardet e BE-së dhe ato evropiane”, është shprehur ai në X.
Zyra e Bashkimit Evropian ishte shprehur se është për keqardhje që s’janë marrë parasysh rekomandimet e saj për këto ligje.
Sipas reagimit, rekomandimet e BE-së për Ligjin për KPM-në dhe KPK-në synojnë përmirësimin e tyre dhe sigurimin e pajtueshmërisë me standardet dhe praktikat më të mira evropiane.
