Ambasadori i BE-së në Kosovë, Tomas Szunyog, deklaroi se Kosova dhe Serbia ende s’kanë filluar të implementojnë obligimet nga marrëveshjet e arritura.
Po ashtu, Szunyog theksoi që e ardhmja e Kosovës është drejt Bashkimit Evropian, por që sipas tij, duhet të vazhdohet me referomat.
“Edhe Kosova dhe Serbia ende nuk kanë filluar të implementojnë obligimet që dalin nga marrëveshja e detyrueshme në rrugën e tyre drejt BE-së. Anëtarësimi në BE është çështje strategjike dhe këtu përshtatja e vlerave të Kosovës me politikat e sigurisë së jashtme vlerësohet. Po ashtu, keni paraqitur zgjedhjen tuaj strategjike duke implementuar reformat e reja. Rekomandimet e vitit të kaluar për reformën në administratën publike nuk janë implementuar mjaftueshëm”, ka thënë ai.
Tutje, Szunyog ka deklaruar se kapacitetet për monitorim të politikave dhe legjislacionit janë përmirësuar.
“Sa i përket konkurrueshmërisë dhe rritjes ekonomike ka bërë progres, në agjendën e gjelbër dhe infrastrukturën rrugore janë bërë përmirësime. Sa i përket tregtisë Kosova ka bërë progres. Mirëpresim progresin e Kosovës në reformat drejtë anëtarësimit në BE duke shikuar mundësitë që nuk duhet të ketë hapësirë për mospajtime për miratimin e reformave. Kosova është e përgatitur mesatarisht në prokurimin publik, qarkullimin e mallrave, politika monetare dhe ekonomike”, ka thënë ai në një konferencë të përbashkët me zëvendëskryeministrin, Besnik Bislimi.
Sipas tij, raporti rekomandon që Kosova të bëjë më shumë në përpjekje për të implementuar legjislacionin kundër korrupsionit që është miratuar kohëve të fundit.