Shqipëria do t’i zhvillojë edhe dy “finale” deri në fund të ciklit eliminator për Evropianin që vitin e ardhshëm organizohet në Gjermani.
Të dyja këto ndeshje i takojnë Grupit E, ku Shqipëria prin me 13 pikë në gjashtë ndeshje, dy më shumë se Republika e Çekisë. Polonia është e treta me 10 pikë në shtatë ndeshje. Në gjashtë ndeshje Moldavia ka grumbulluar nëntë pikë, kurse Ishujt Faroe në shtatë ndeshje e kanë vetëm një pikë.
Sylvinho është i vetëdijshëm se janë katër skuadra ende në lojë për t’u kualifikuar në Evropian. Dhe për këtë ka kërkuar përqendrim maksimal.
Shqipërisë i duhet vetëm edhe një pikë nga dy ndeshjet e fundit për ta siguruar kalimin tutje.
“Duhet të luajmë fort dhe t’i përgatisim sa më mirë këto ndeshje. Nuk mund të them që kam frikë, por sigurisht që jam i preokupuar për këto dy ndeshje, sepse janë dy finale shumë të rëndësishme. Ne jemi të fokusuar vetëm te ndeshja me Moldavinë. Lojtarët janë mirë dhe kemi vetëm një mungesë që është Mihaj, i cili nuk ia doli shkaku i dëmtimit. Të tjerët janë gati. Futbolli luhet në fushë për 90 minuta dhe mund të ndodhë gjithçka, por ne jemi të përgatitur për çdo situatë”, ka thënë Sylvinho të shtunën në konferencën për shtyp.
Në listën e 24 lojtarëve të Sylvinhos është rikthimi i Arbnor Muçollit. Mungon edhe Armando Broja, sulmuesi i Chelseat, që është i lënduar po ashtu.
Megjithatë, me grupin që ka në dispozicion, tekniku brazilian është i bindur se paraqitja do të jetë e mirë.
“Moldavia është ende në garë dhe na pret ndeshje e vështirë. Nuk mund të shkojmë në një ndeshje futbolli dhe të hyjmë në fushë me idenë që të marrim një pikë. Duhet të marrim maksimumin në një ndeshje shumë të vështirë dhe duhet të luajmë gjithmonë ashtu siç kemi bërë gjatë këtyre ndeshjeve. Do të jemi të organizuar në fushë, do të vendosim zemrën dhe shpirtin dhe do të luajmë ndeshjen tonë ashtu siç kemi bërë në të gjitha sfidat e kaluara”, deklaroi Sylvinho.
Sylvinho drejtimin e Shqipërisë e mori në fillim të këtij viti dhe është shumë afër që t’i kualifikojë “kuqezinjtë” në një tjetër Kampionat Evropian.
Një gjë të tillë Shqipëria e kishte arritur në vitin 2016, kur ishte kualifikuar në Evropianin që u mbajt në Francë.
