Është dita e dytë e dëshmisë së tij në Dhomat e Specializuara në Hagë.
E gjatë së martës, ish-komandanti i Shtabit të Përgjithshëm të Ushtrisë Çlirimtare të Kosovës, Sylejman Selimi foli për nivelet komanduese mes ushtarëve në teren e Shtabit të Përgjithshëm.
Lidhur me këtë, Selimi iu përgjigj pyetjeve të avokatit të ish-presidentit Hashim Thaçi, Luka Mishetiq.
Mishetiq: Keni deklaruar, në deklaratën tuaj, se në atë kohë nuk kishte nivele komanduese, flasim për pranverën 1998, nuk ka pasur nivele komanduese mes ushtarëve në teren dhe Shtabit të Përgjithshëm, saktë?
Selimi: Po është e saktë.
Mishetiq: A mund të themi se në atë kohë, struktura e UÇK-së në atë kohë ishte thjeshtë disa njerëz bashkëfshatarë që mblidheshin dhe përpiqeshin të krijonin një strukturë?
Selimi: Po.
Selimit iu kërkua të konfirmojë nëse i bënin vet propozimet se kush do të jetë përgjegjës për çfarë detyre dhe kush do të jetë komandant i zonës.
Selimi: Ka pasur në zonën e Drenicës disa grupe ose disa shokë të tjerë të cilët kanë pasur edhe ata ushtarët e vet, dhe prej gjithë këtyre grupeve ne kemi ardhur deri te një propozim për komandant të Drenicës. Është e saktë.
Ish komandanti e ka nisur dëshminë të hënën, si dëshmitar me kodin 04290.
Selimit i është dhënë garancia se nuk do të ndiqet penalisht për dëshminë e tij.
