Zëvendësministri i Mbrojtjes së Kosovës, Shemsi Syla ka thënë se deklarimet nga Serbia se marrëveshja në fushën e mbrojtjes mes Kosovës, Shqipërisë dhe Kroacisë është provokim nuk ka qenë befasi për ta.
Ai ka thënë se mund të presin diçka ndryshe nga Serbia, sepse asaj nuk i konvenon bashkëpunimi e forcimi i sigurisë së Kosovës.
“Nuk është e befasishme dhe askush nuk duhet mu befasua pse Serbia reagon, normal që Serbia nuk i gëzohet asnjë bashkëpunimi dhe një afrim i të tillë me Kroacinë e Shqipërinë. Ne s’na ka befasuar, e dimë ku e kanë, ku ju djeg, bashkëpunimi, rritja e sigurisë nuk ju konvenon. Atyre ju konvenon një destabilzim, një dobësim i shteteve që ta zhvillojnë luftën hibride që janë duke e bërë dhe me dobësu elementin në Kosovë. Ata nuk na njohin dhe andaj na luftojnë”, ka thënë Syla në emisionin “InfoNata” në Tëvë1.
Syla duke folur për deklarimet e historianit zviceran Shmitt se Kosova është me e rrezikuar nga një luftë dhe siç ai ka thënë duhet të merr shembull planin mbrojtës të Finlandës, ka thënë se Kosova ka planin e saj të zhvillimit dhe mbrojtjes.
“Planin e zhvillimit, planin e mbrojtjes që të gjitha janë dhe punohet në bazë të planeve, në bazë të rreziqeve, kërcënimeve, forcave proporcionale, çfarë e rrethon bëhet edhe plani”, ka thënë Syla.
Ndryshe, ministria e Punëve të Jashtme e Serbisë në një reagim e ka konsideruar “provokim” marrëveshjen për aleancën ushtarake të nënshkruar nga ministrat e Mbrojtjes të Kosovës, Shqipërisë dhe Kroacisë.
Në reagim, Serbia ka thënë se do t’u dërgojë kërkesë urgjente ministrive të Jashtme të Kroacisë dhe Shqipërisë, duke kërkuar shpjegim të detajuar lidhur me nënshkrimin e memorandumit trepalësh për bashkëpunim në fushën e mbrojtjes.
