Ish-diplomati, Donat Syla ka deklaruar se nëse nesër( më 17 prill) nuk konstituohet Kuvendi i Kosovës atëherë presidentja e Kosovës, Vjosa Osmani ka të drejtë ta dërgoj vendin në zgjedhje të jashtëzakonshme.
Syla ka thënë se kjo mund të ndodhë për shkak se sipas tij kështu e thotë Kushtetuta e Republikës së Kosovës pasi nesër bëhen 30 ditë nga dita e certifikimit të rezultateve të zgjedhjeve të 9 shkurtit.
“Nesër është dita e fundit për konstituimin e Kuvendit. Në rast se nuk ndodh kjo atëherë presidentja ka të drejtë ta dërgoj vendin në zgjedhje të jashtëzakonshme sipas Kushtetutës së Republikës së Kosovës. Jo rastësisht edhe presidenca në mënyrë të menjëhershme i përgjigjet letrës që ia ka dërguar deputeti më i vjetër Avni Dehari dhe brenda ditës thotë në mënyrë eksplicite që duhet të mbahet seanca e rradhës jo më larg se 48 orë nga dita kur ka dështuar seanca për shkak se më 18 mars është bërë certifikimi i rezultateve të zgjedhjeve të 9 shkurtit dhe nga 18 marsi deri nesër janë saktësisht 30 ditë. Nëse nuk konstituohet Kuvendi brenda 30 ditëve sipas Kushtetutës së Kosovës, presidenca ka të drejtë, ka mandatin dhe detyrimin ligjor dhe kushtetues që ta shpërndaj këtë kuvend dhe ti shpallë zgjedhjet e jashtëzakonshme që duhet të mbahen brenda 45 ditëve. Zvarritjet mund të vazhdojnë pafundësisht për zgjidhjen e kryetarit të kuvendit mirëpo për konstituimin e kuvendit është dita e fundit nesër kur duhet të konstituohet”, ka thënë ai në emisionin “Info Nata” në Tëvë1.
Ndryshe, seanca konstituive e ndërprerë të martën, do të vazhdojë nesër më 17 prill nga ora 12:00, ka bërë të ditur Kuvendi i Kosovës në faqen zyrtare.
