Diplomati, Donat Syla ka deklaruar se është evidente që meritat për njohjen e Kosovës nga shteti i Kenias i ka ish-presidenti i Kosovës, Behgjet Pacolli.
Sipas tij, lobimi i Pacollit nuk është vetëm në Kenia por edhe në shumë vende tjera të cilat mund të marrin vendim për njohje të Kosovës në një periudhë të ardhshme kohore.
Syla në emisionin “Info Nata” ka shtuar se gjatë periudhës 5 vjeçare institucionet e Kosovës kanë qenë tërësisht inekzistente në lobimin në arenën ndërkombëtare për të fuqizuar rolin e Kosovës.
“Besoj që rëndësia kryesore është që ky ngërçi 5 vjeçar në të cilin jemi bllokuar është zhbllokuar. Se kush i ka meritat besoj se është evidente ajo se gjithandej edhe është pranuar si nga zyrtarët e si nga institucionet pra që ka pasur një angazhim të jashtëzakonshëm të ish-presidentit Behgjet Pacolli jo vetëm këtë vit por me vite e vite. Lobimi i tij nuk është vetëm te Kenia por është edhe në shumë vende të tjera të cilat mund të marrin vendim në periudhat e ardhshme kohore. Absolutisht konsideroj që në këtë periudhë institucionet e Kosovës kanë qenë tërësisht inekzistent në lobimin në arenën ndërkombëtare për të fuqizuar rolin e Kosovës”, ka thënë ai.
Ndërkaq, qesharake dhe infantile e ka quajtur deklaratën e ministres Gërvalla se ishte ajo dhe presidentja Osmani që u takuan me ish-presidentin e Kenias në vitin 2021 ku tha se në takim ka parë rrugën graduale drejt njohjes reciproke.
“Sa i përket reagimit të ministres sonë të Punëve të Jashtme është në vazhdën e reagimeve të saj mund të them qesharake ose infantile që vazhdimisht i ka bërë. Uroj që kur të bëjë postime në shenjë mirënjohje për shtetin e Kenias në platformën “X” mos t’i ngatërroj flamujt ose emrin e Kenias me ndonjë shtet tjetër, kjo është e rëndësishme sepse zakonisht ka bërë këso gabimesh”, ka shtuar Syla.
Ndryshe, Republika e Kenias të mërkurën e ka njohur shtetin e Kosovës duke u bërë shteti i 118-të që e ka njohur pavarësinë e Kosovës.
Ish-presidenti i Kosovës, Behgjet Pacolli, ishte i pari që njoftoi për njohjen e vendit nga Kenia, para se presidentja e tanishme, Vjosa Osmani, të konfirmonte zyrtarisht se ka pranuar njohjen nga homologu i saj kenian, William Ruto./teve1.info/
