Ai në një intervistë për mediumin serb “N1” tha se Kosova ka qenë një “El Dorado” për kriminelët gjatë 20 viteve të fundit.
Sipas tij, serbët, shqiptarët dhe boshnjakët janë përfshirë në krimin që e ka mbështetjen politike nga Beogradi teksa përmendi shembullin e nënkryetarit të Listës Serbe, Milan Radoiçoq i cili është futur në listën e zezë nga Uashingtoni për akuza korrupsioni në Kosovë.
“Një vështrim në situatën e sigurisë në veri na bën të kuptojmë se kjo nuk është vetëm një krizë e fundit. Veriu i Kosovës, katër komunat (me shumicë serbe) në veri ishin një vrimë e zezë për sa i përket sundimit të ligjit. Kjo është një zonë me një nivel shumë të lartë të kontrabandës dhe krimeve të ndryshme të kryera pa u ndëshkuar”, tha Svecla.
Tutje, ai tha se ka kriminelë në veri që kanë kaluar nga varfëria apo shtresa e mesme në multimilionerë falë aktivitetit kriminal “që është toleruar për më shumë se 20 vjet”.
“Kemi kriminelë që kaluan nga varfëria apo shtresa e mesme në multimilionerë falë aktivitetit kriminal që është toleruar për më shumë se 20 vjet. Unë kam marrë dhjetëra, në mos qindra ankesa nga njerëz që janë nën presion nga grupet kriminale. Ato grupe nuk duan vetëm të jenë të pasur, por janë pengesë për jetën normale me sjelljen e tyre arrogante bandit. Prioriteti ynë është vendosja e ligjshmërisë atje”, tha ministri.
Po ashtu, Sveçla theksoi se Policia e Kosovës ka zbuluar pesë laboratorë droge dhe operacione ilegale të prodhimit të Bitcoinit si dhe kamionë me kontrabandim të mallrave.
“Ka një lidhje të qartë mes politikës dhe krimit dhe kur them krim nënkuptoj lidhje shumëkombëshe. Ne arrestuam një numër grupesh kriminale të përbëra nga shqiptarë, serbë, boshnjakë nga Kosova dhe Serbia”, tha Svecla.
Ai thotë se qeveria serbe po i toleron ato grupe kriminale dhe po i përkrah me synimin për të ushtruar presion mbi popullatën lokale në veri të Kosovës.
