Ministri i Punëve të Brendshme, Xhelal Sveçla, ka prit sot në takim ambasadorin jo rezident të shtetit të Katarit në Kosovë, Jabor Hussein Al Hawashela Al Dosari.
Përmes një komunikate, MPB ka njoftuar se gjatë takimit u diskutua për situatën e sigurisë dhe përkushtimin e institucioneve të Kosovës për të garantuar siguri e stabilitet në tërë vendin.
“Ministri Sveçla e njoftoi ambasadorin Al Dosari për mandatin e Ministrisë së Punëve të Brendshme dhe prioritetet në sundimin e rendit dhe ligjit, administratës shtetërore efikase dhe shërbime për të gjithë qytetarët pa dallim. Në takim u diskutua edhe për situatën e sigurisë dhe përkushtimin e institucioneve tona për të garantuar siguri dhe stabilitet në të gjithë territorin e Republikës së Kosovës”, thuhet në komunikatën e Ministrisë.
Mirëpo, thuhet se me theks të veçantë, palët kanë diskutuar për potencialin dhe mundësinë e investimit në fushën e sigurisë në Kosovë.
“Në anën tjetër ambasadori Al Dosari shprehu mbështetjen e plotë të shtetit të Katarit në ngritjen dhe forcimin e institucioneve tona dhe gatishmërinë për shkëmbimin e përvojave më të mira mes zyrtarëve tanë. Me theks të veçantë palët diskutuan edhe për potencialin dhe mundësitë e investimit në fushën e sigurisë në Republikën e Kosovës”, thuhet tutje në komunikatë.
Teksa në përfundim, thuhet se Sveçla dhe ambasadori Al Dosari, u dakorduan për bashkëpunim të ngushtë dhe konkret mes ministrive të të dyja shteteve./teve1.info/.
