Përmes një postimi në Facebook, ai u shpreh se lufta ndaj krimit të organizuar dhe krimeve tjera do të vazhdojë pa asnjë kompromis.
“Përgëzoj Inspektoratin Policor dhe Policinë e Kosovës për aksionin e mbrëmshëm në kuadër të luftës ndaj krimit të organizuar, i zhvilluar në disa komuna të Republikës së Kosovës. Lufta jonë ndaj krimit të organizuar dhe çdo lloj krimi tjetër do të vazhdojë, pandalshëm, pa asnjë kompromis, dhe të gjithë do të trajtohen të barabartë para ligjit pavarësisht funksionit që bartin”, shkroi ndër tjerash ai.
Sveçla theksoi se po punojnë për ngritje të efikasitetit por edhe integritetit brenda institucioneve, duke shtuar se aksioni i mbrëmshëm dëshmon vullnetin dhe gatishmërinë për këtë.
“Nuk mund dhe nuk do të lejojmë asesi të keqpërdoret misioni për t’u shërbyer qytetarëve. Siç edhe jemi zotuar, po punojmë në vazhdimësi për ngritje të efikasitetit por edhe të integritetit brenda secilit institucion andaj aksioni i mbrëmshëm e dëshmon vullnetin dhe gatishmërinë për të jetësuar këtë. Mirëqenia dhe siguria e qytetarëve të Republikës së Kosovës janë prioritet. Mbi këtë parim do të vazhdojmë të luftojmë secilën dukuri apo individ që minon sundimin e ligjit apo që cënon jetën e qytetarëve, rendin dhe sigurinë publike”, shkroi ndër tjerash ai.
Ndryshe ky aksion është zhvilluar të mërkurën nga Prokuroria Themelore e Prizrenit në bashkëpunim me Policinë e Kosovës.
Prokuroria ka njoftuar se janë sekuestruar 55 mijë e 388 euro, dy armë zjarri, 39 copë municion dhe 29 telefona mobil.
“Lidhur me këtë rast janë bastisur- kontrolluar 19 lokacione (vendbanime dhe lokale), dhe në cilësi të provave janë sekuestruar: Para te gatshme – 55,388.00 euro (44,861.00 bankënota dhe 10.527.00 monedha të metalta); Para të gatshme – 1,700.00 franga zvicerane; Para të gatshme – 50,000.00 lek; Para të gatshme – 100.00 dollar; Para të gatshme – 1,320.00 dinar serb; Dy (2) armë (një e shkurtë dhe një gjysmë- automatike); Tridhjetë e nëntë (39) copë municion; Njëzet e nëntë (29) telefona mobil; Një (1) Kompjuter llaptop; Dy (2) USB; Treqind e pesëdhjetë (350) pako cigare pa banderola; Gjashtë (6) vetura”, thuhet në njoftim.
Tutje, është bërë e ditur se të arrestuarit gjenden në masën e ndalimit prej 48-orësh dhe se pritet që të kërkohet caktimi i masës së paraburgimit./teve1.info/
