Sot janë bërë dy vjet nga sulmi terrorist në Banjskë të Zveçanit, i udhëhequr nga Millan Radoiçiq dhe grupi i tij, ku mbeti i vrarë rreshteri i Policisë së Kosovës, Afrim Bunjaku. Nga ky sulm u plagos polici Alban Rashiti dhe u lëndua një tjetër pjesëtar i Policisë.
Me këtë rast, krerët e shtetit bënë homazhe në nderim të heroit Bunjaku, ndërsa pranë varrit të tij shkuan edhe deputetë e ambasadorë.
Gazetari i Teve1, Venhari Isufi, solli një reportazh kushtuar kësaj ngjarjeje, ku u rikujtua se si ndodhi sulmi. Në reportazh foli edhe ministri në detyrë i Punëve të Brendshme, Xhelal Sveçla.
I pyetur për kapacitetet policore në rast të një sulmi të ngjashëm nga grupet kriminale serbe, Sveçla theksoi se Policia e Kosovës tashmë është më e fortë.
“Në përgjithësi, përgjatë kohës, sa të punojmë ne, raportet e forcës po ndryshojnë. Do të thotë, ne nuk jemi ata të para katër vitesh, nuk jemi ata të para dy vitesh, nuk jemi as ata të para një viti. Po punojmë në vazhdimësi që kapacitetet tona të rriten, të fuqizohen dhe të jenë të gatshme të përgjigjemi ndaj çfarëdo lloj sfide që mund të vijë nga Serbia”, tha Sveçla për Teve1.
Ai shtoi se brenda Kosovës nuk sheh ndonjë kapacitet për destabilizim të madh, por gjithsesi ekziston rreziku për incidente.
“Mendoj që momentalisht, për brenda Kosovës, nuk shohim ndonjë kapacitet për destabilizim të madh. Por gjithsesi ka potencial për incidente e konflikte të këtij lloji, duke qenë se as nuk ka ndërruar regjimi në Serbi, por as qasja e tyre ndaj Kosovës”, u shpreh Sveçla.
Ministri nënvizoi se shumica e qytetarëve serbë në Kosovë duan qetësi dhe stabilitet.
“Shumica e qytetarëve të komunitetit serb dëshirojnë qetësi, dëshirojnë stabilitet dhe mundësi për prosperitet. Atë ne po e ofrojmë, duke pasur mbi të gjitha parasysh garancitë që atyre duhet t’u japim për mbrojtje nga ekstremistët”, tha ai.
Duke folur për ndikimin e grupeve kriminale serbe në veri, Sveçla tha se pushteti i tyre është minimizuar.
“Përderisa më herët Radoiçiqi dhe terroristët e tjerë ishin të pushtetshëm ndaj pjesëtarëve të komunitetit serb në Kosovë, tashmë ky pushtet dhe kjo fuqi e tyre është duke u minimizuar. Roli ynë është që ai pushtet ndaj qytetarëve tanë të eliminohet në plotësi”, deklaroi Sveçla.
