Ministri i Punëve të Brendshme, Xhelal Sveçla e ka quajtur të papranueshëm sulmin ndaj dy të rinjve shqiptarë mbrëmë në Mitrovicë të Veriut.
Përmes një postimi në Facebook, ai ka bërë të ditur se organet janë të angazhuara që sulmuesit të sillen para drejtësisë, përcjell teve1.info
Ai po ashtu theksoi se secili që ka qenë pjesë po ashtu e sulmeve ndaj KFOR-it, do të sillet para drejtësisë, përcjell teve1.info
“Mbrëmë, 15 deri në 20 persona kanë rrahur dy të rinj shqiptarë. Ky akt, si çdo tjetër është i papranueshëm dhe organet tona janë të angazhuara që sulmuesit të sillen sa më parë para drejtësisë. Në anën tjetër, Policia e Kosovës sot ka arrestuar Nenad Orlovic, i njohur me nofkat “Nemac” dhe “Rusi”, i cili dyshohet për sulm ndaj KFOR-it në ditën e 29 majit në Zveçan ku mbeten të plagosur shumë ushtarë. Pandëshkueshmëria dhe amnistia ndër vite e kriminelëve të tillë, ka rezultuar me sulme brutale ndaj KFOR-it nga të cilat mbi 30 pjesëtarë mbetën të lënduar. Secili që ka organizuar dhe ka qenë pjesë e atyre sulmeve do të sillet para drejtësisë”, ka shkruar ai.
Sipas Sveçlës, secili do të japë llogari për secilin krim.
“Republika nuk trembet. Secili do të japë llogari për secilin krim. Do të vazhdojmë pa u ndalur, në luftë ndaj të gjitha bandave që kanë për synim terrorin ndaj qytetarëve tanë e destabilizimin e vendit tonë”, ka shtuar ai.
Dy të rinj janë sulmuar nga disa persona mbrëmë në sheshin “Car Lazar” në Mitrovicë të Veriut, me ç’rast kanë marrë ndihmë mjekësore. /Teve1.info/