Ministri në detyrë i Punëve të Brenshëm, Xhelal Sveçla po qëndron në Slloveni me ftesë të ministrit të Brendshëm, Boštjan Poklukar në kuadër të procesit të BRDO-s.
Në këtë forum kanë marrë pjesë edhe komisionerja për zgjerim, Marta Kos dhe komisioneri për punë të brendshme dhe migrim, Magnus Brunner.
Sipas njoftimit të ministrit, gjatë forumit kanë diskutuar për rreziqet reale të kohës, terrorizmi dhe trafikimi me qenie njerëzore.
Tutje, Sveçla theksoi rezultatet në luftën ndaj terrorizmit dhe sfidat që Kosova ka pasur në këtë drejtim për shkak të sulmeve të vazhdueshme të Serbisë që të destabilizojë situatën e sigurisë në Kosovë.
“Theksova se sulmi terrorist në Banjskë më 24 shtator 2023 vazhdon të mbetet një çështje e pazgjidhur, me kryesitë e krimit ende të arratisur. Po ashtu, vura në pah se vetëm në gjysmën e fundit të vitit 2024, në Kosovë kanë ndodhur 11 sulme që përfshijnë përdorimin e pajisjeve shpërthyese, përfshirë sulmet ndaj Stacionit të Policisë në Zveçan dhe ndërtesës së Komunës, si dhe ndaj kanalit të ujit Ibër Lepenc në Zubin Potok, i cili furnizon Kosovën me 60 përqind të ujit të pijshëm”, thuhet në postimin e tij./teve1.info/
