Ministri i Punëve të Brendshme, Xhelal Sveçla është shprehur i kënaqur pas vendimit të sotëm të Këshillit të Ministrave të Bashkimit Evropian për miratimin e liberalizimit të vizave për Kosovën.
Sveçla ka falënderuar të gjithë ministrat që mbështetën këtë proces i cili siç tha ai, do të përmbyllet së shpejti.
Teksa ka thënë se Kosova do të vazhdojë të punojë drejt integrimit evropian në bashkëpunim të ngushtë me partnerët e saj.
“Republika e Kosovës sot bëri edhe një hap pozitiv më afër liberalizimit të vizave. Jam i kënaqur që Këshilli i Ministrave të Bashkimit Evropian ka miratuar me shumicë votash liberalizimin e vizave për Kosovën. Falënderoj të gjithë Ministrat për votën pozitive dhe besoj që ky proces do të përmbyllet së shpejti. Ne do të vazhdojmë të punojmë drejt integrimit evropian në bashkëpunim të ngushtë me partnerët tanë”, ka shkruar ai.
Ndryshe, Demush Shasha, njohës i integrimeve evropiane njoftoi sot se Këshilli i Ministrave të Bashkimit Evropian ka miratuar liberalizimin e vizave për Kosovën. Sipas tij, tani ka mbetur edhe miratimi në Parlamentin Evropian.
Njoftimin e bëri edhe presidenca suedeze e Këshillit të BE-së, përmes një postimi në Twitter.
Përmes këtij postimi, KE njoftoi edhe për vendimin e këtij institucioni për procesin e liberalizimit të vizave për qytetarët e Kosovës./teve1.info/
https://teve1.info/lajmet/kosovaret-mund-te-qendrojne-90-dite-ne-be-pa-viza/
