Sipas tij, ajo zonë ka qenë deri vonë imune ndaj çdo ligji të Republikës së Kosovës duke pas parasysh që është izoluar dhe mirëmbajtur nga grupet kriminale e të ndihmuara nga Beogradi.
Këto deklarime Sveçla i bëri gjatë një konferencë rreth iniciativës globale mbi krimin e organizuar e cila u mbajt në ambasadën italiane, ku u diskutua rreth bashkëpunimit të policisë së Kosovës dhe asaj të Italisë për situatat aktuale të drogave.
Në këtë tryezë u tha se po ballafaqohen me sfida të mëdha të zvogëlimit dhe parandalimit të kësaj dukurie dhe kapjen e personave që bëjnë gjëra të jashtëligjshme duke prodhuar kështu qëndrueshmëri shoqërore që ju reziston fenomeneve të tilla.
“Kultivimi, posedimi, shitja dhe përdorimi i substancave narkotike nuk mund të gjykohet vetëm si ndeshje me ligjet e Republikës së Kosovës por është fenomen që cenon drejtpërdrejtë jetën e përdoruesve të rëndomtë dhe atyre që jetojnë përreth tyre dhe me ta. Si Ministri e Punëve të Brendshme në tërësi por edhe me agjencitë ekzekutive në veçanti jemi të angazhuar maksimalisht që me të gjitha kapacitetet tona të punojmë në zvogëlimin e kësaj dukurie si dhe në kapjen e të gjithë atyre që kultivojnë dhe shpërndajnë cilindo lloj të substancave narkotike”, tha Sveqla.
Ndërkaq ai foli edhe për hartimin e strategjisë katër vjeçar kundër narkotikëve.
Sipas ministrit Sveqla, gjatë këtij mandati kanë realizuar operacione të mëdha të kapjes së 1.7 ton të lëndëve narkotike, ndërsa tha se pjesa veriore e vendit është më e prekura nga kjo dukuri e që janë të ndihmuar nga grupet kriminale dhe Beogradi.
“Pas më shumë se një vit e gjysmë janë sekuestruar mbi 1.7 ton substanca narkotike të llojeve të ndryshme si: Marihuanë 1064 kg, kokainë 420 kg, heroinë 240 kg dhe mbi 27 mijë bimë kanabisi.
Dukuria e kultivimit dhe shpërndarjes është e shprehur në masë të madhe në veriun e vendit tonë. Ajo zonë ka qenë deri vonë imune ndaj çdo ligji të Republikës së Kosovës duke pas parasysh që është izoluar dhe mirëmbajtur nga grupet kriminale e të ndihmuara nga Beogradi. Me aktivitetet tona në atë zonë ka rezultuar me shkatërrimin e 5 laboratorëve të drogës në të cilat ka pasur dhjetëra miliona investime”, tha ai.
Kurse ambasadori i Italisë, Antonello De Rio, tha se krimi i organizuar shqiptar kontrollon disa tregje dhe për t’iu kundërvënë kësaj dukurie në nëntor të vitit 2020 Italia ka bërë bashkëpunim me policët e Kosovës.
Ai kërkon që të parandalohet sa më shpejtë krimi i organizuar dhe ndalimi i trafikimit të lëndëve narkotike.
“Natyra transnacionale e trafikimit të drogave, lokacioni strategjik që ka Kosova ditë e fundit ka rritur rëndësinë e saj si kryqëzim për tregtinë e paligjshme që ka rrjedhur nga vendet e tjera të cilat arrijnë në kontinentin evropian duke kaluar përmes vendeve të Ballkanit Perëndimor. Në aspektin nacional ky është fenomen i cili ka filluar dekada të tëra e nxitur nga rënia regjimit komunist në Shqipëri dhe nga tranzicioni. Krimi i organizuar shqiptar kontrollon disa tregje në Holandë, Mbretërinë e Bashkuar, Francë dhe Gjermani. Ka qenë bashkëpunim i frytshëm në mes forcave policore të Kosovës, Shqipërisë dhe Italisë që në vitin e kaluar u bë i mundur konfiskimi apo kapja e 400 kg kokainë që vinte nga ekuatori”, tha ai.
Në fund foli drejtoresha e Observatorit të Evropës Juglindore Fatjona Mejdini e cila u shpreh se në Kosovë krimi i organizuar nuk ka qenë temë qendrore sepse ka pasur sfida të tjera gjatë viteve të kaluara por ajo theksoi se po rrezikohet të preket nga krimi i organizuar sepse krimi ndikon thellë duke shkatërruar jetën e të rinjve./KP/
