Ministri i Punëve të Brendshme, Xhelal Sveçla ka përgëzuar Departamentin e Hetimeve, në kuadër të Policinë e Kosovës, për aksionet e zhvilluara mëngjesin e sotëm në Prishtinë.
Sveçla ka njoftuar se drejtori të ndryshme të PK-së kanë zhvilluar tri aksione kundër fajdeve dhe për mashtrimet me kartela bankare, përcjell teve1.info
“Që nga mëngjesi i hershëm janë duke u zhvilluar tre aksione nga Drejtori të ndryshme të Policisë së Kosovës. Krimet ekonomike në Ndërmarrjen Publike Banesore, Krimet e Rënda janë duke zhvilluar aksione kundër fajdeve dhe Krimet Kibernetike për mashtrimet me kartela bankare. Angazhimi ndaj çdo lloj krimi do të intensifikohet, përgëzoj Departamentin e Hetimeve për secilin rezultat të arritur”, ka shkruar ai në Facebook.
Policia e Kosovës ka zhvilluar sot një operacion policor në Ndërmarrjen Publike Banesore në Prishtinë.
Këtë ka konfirmuar për teve1.info, zëdhënësi i Policisë, Bajram Krasniqi.
“Mund të konfirmojmë se Policia e Kosovës në bashkëpunim dhe koordinim me organet e drejtësisë, janë duke realizuar disa operacione policore, në disa lokacione/rajone të ndryshme. Pas përfundimit të operacioneve, do të bëhen të ditura detajet shtesë rreth këtyre operacioneve policore”, deklaroi ai.
PK-ja po ashtu ka zhvilluar sot një aksion tjetër kundër fajdeve në Prishtinë e Podujevë, me ç’rast janë arrestuar katër persona. /Teve1.info/
