Ministri i Punëve të Brendshme, Xhelal Sveçla ka marrë sot pjesë në Forumin e Ministrave të Brendshëm që është mbajtur sot nën organizimin e Presidencës Spanjolle të Këshillit të Evropës dhe Ministrisë së Brendshme të Maqedonisë së Veriut.
Në një postim në Facebook, Sveçla bën të ditur se në këtë Forum diskutuan ndër të tjerash për luftimin e ekstremizmit të dhunshëm dhe terrorizmit, luftimin e substancave narkotike në shoqëritë, si dhe migrimin.
Gjatë këtij takimi, ai po ashtu ka theksuar se falë angazhimit të Policisë së Kosovës, më 24 shtator është “parandaluar një katastrofë” në Banjskë të Zveçanit, përcjell teve1.info
“Në fjalën time theksova angazhimin e Qeverisë së Republikës së Kosovës në luftën ndaj ekstremizmit të dhunshëm dhe terrorizmit, veçanërisht duke njohur faktin që institucionet tona dhe zyrtarët tanë, prej më shumë se dy vitesh janë ballafaquar me sulme të njëpasnjëshme terroriste në veriun e vendit tonë. Duke përshëndetur Rezolutën e Parlamentit Evropian që dënon sulmin terrorist të 24 shtatorit në Banjskë të Zveçanit ku humbi jetën Rreshter Afrim Bunjaku, ritheksova rëndësinë e sanksionimit të Serbisë si parandalim që sulmet e tilla të mos përsëriten më. Theksova se falë angazhimit dhe profesionalizmit të Policisë sonë, me 24 shtator u parandalua një katastrofë dhe u mbrojtën jetët e qytetarëve, të zyrtarëve të tjerë policor, sovraniteti dhe integriteti territorial i Republikës sonë”, është shprehur ai.
Ministri Sveçla potencoi se gjithashtu ka rikonfirmuar gatishmërinë e Kosovës për avansim të politikave që synojnë siguri e paqe për rajonin.
“Prezantova angazhimet tona si institucione në fushën e drogave, migrimit, azilit dhe menaxhimit të integruar të kufirit si në aspektin e legjislacionit i cili është në përputhje të plotë me direktivat e BE-së, bashkëpunimin me shtetet e rajonit në këto dhe me Agjencitë e BE-së në këto fusha. Rikonfirmova gatishmërinë tonë të plotë për bashkëpunim dhe avansim të politikave që synojnë siguri, paqe e drejtësi për vendet tona dhe për rajonin tone”, ka shkruar ai në Facebook. /Teve1.info/
