Ministri në detyrë i Punëve të Brendshme, Xhelal Sveçla, ka dorëzuar sot çelësat e objektit të ri të Agjencionit të Regjistrimit Civil (ARC) në Ferizaj.
Përmes një postimi në Facebook, Sveçla ka njoftuar se vlera e përgjithshme e investimit kap shifrën prej 528 mijë e 217 euro, ndërsa objekti ka një sipërfaqe prej 950 metrash katrorë.
Sipas tij, ky objekt do të shërbejë për Qendrën për Pajisje me Dokumente dhe Qendrën për Regjistrimin e Automjeteve, me shërbime tërësisht të ndara.
“Nga shërbimet tërësisht të ndara të Agjencionit të Regjistrimit Civil në Ferizaj, sot u bë dorëzimi i çelësave të objektit të ri, i cili pas bartjes së inventarit do të funksionalizohet brenda ditësh. Vlera e përgjithshme e investimit është 528.217 €, me hapësirë 950 metra katrorë, në funksion të Qendrës për Pajisje me Dokumente dhe Qendrës për Regjistrimin e Automjeteve”, ka shkruar Sveçla.
Ai ka uruar qytetarët e Ferizajit dhe zyrtarët e ARC-së, duke theksuar se ky investim do të përmirësojë kushtet e punës dhe cilësinë e shërbimeve për qytetarët./teve1.info/
