Ministri i Punëve të Brendshme, Xhelal Sveçla, ka njoftuar se ka nënshkruar Udhëzimin Administrativ për trajnimin dhe çertifikimin e minandezësve.
Sipas Sveçles, kjo është bërë me kërkesë të Trepçës me qëllim të rritjes së kapaciteteve nxjerrëse të xehes në Minierën e Stan Tërgut, shkruan teve1.info
“Falënderoj grupin punues që në afat rekord kanë punuar këtë dokument të rëndësishëm që ka adresuar në plotni kërkesat e punonjësve të Trepçës.Si Qeveri do të ndërmarrim çdo hap të nevojshëm që Trepça të ngritet e të zhvillohet”, ka shkruar ai në Facebook.
Ndryshe, të martën, menaxhmenti i ndërmarrjes publike “Trepça” ka shpallur gjendje të jashtëzakonshme në këtë ndërmarrje duke ua pezulluar pushimet punonjësve.
Sipas menaxhmentit, arsyetimi për këto vendime ka qenë mungesa e aktivitetit për afër një muaj në këto njësi, ku sipas tyre, ka pasur humbje të mëdha në prodhim dhe ndalesë në realizimin e planit të biznesit./teve1.info/
