Policia e Kosovës gjatë ditës së sotme ka arrestuar në Leposaviq, ish-zyrtarin policor Goran Savic, pasi që i njëjti akuzohet për keqpërdorim të detyrës zyrtare gjatë vitit 2021.
Këtë e ka bërë të ditur, ministri i Punëve të Brendshme, Xhelal Sveçla, i cili thotë se Savic dyshohet se ka sulmuar edhe dy qytetarët serbë.
Tutje, ai ka njoftuar se Policia e Kosovës sot në një lokacion në Komunën e Zubin Poktokut ka identifikuar dhe sekuestruar 20 pajisje të prodhimit të kriptovalutave.
Ndërkaq, Sveçla ka shkruar edhe për anëtarësimin e Policisë në kampanjën e EUROPOL.
“Ditën e përmbyllim me lajmin e mirë që Policia jonë i është bashkuar kampanjës së EUROPOL #TheNetThatWorks, në kuadër të Ditës Ndërkombëtare të Bashkëpunimit Policor. Kjo nismë pjesë e së cilës është edhe Policia e Kosovës, synon promovimin e bashkëpunimit me qëllim të trajtimit të kërcënimeve kundër sigurisë, luftën kundër krimit të organizuar, atij kibernetik dhe terrorizmit. Faleminderit pjesëtarëve të Policisë sonë që me punën e tyre profesionale garantojnë siguri, rend dhe ligj kudo në Republikën tonë!”, ka shkruar ministri./teve1.info/
