Është suspenduar nga puna komandanti i Stacionit Policor në Skenderaj, pas rekomandimit nga Inspektorati Policor i Kosovës, pasi që i njëjti dyshohet se së bashku me disa zyrtarë të tjerë policorë kanë shkuar për ngushëllime te familja e Faton Hajrizit.
Lajmin për Tëvë1, e ka konfirmuar Policia e Kosovës.
“Policia e Kosovës është institucion i zbatimit të ligjit dhe në të gjitha rastet përfshirë këtë rast, veprimet e saja i ndërmerr komfor autorizimeve ligjore që ka dhe rekomandimeve të IPK-së, duke zbatuar të njëjtit.” thuhet në përgjigjen e tyre.
Ndryshe, Inspektorati Policor i Kosovës të martën i ka rekomanduar Policisë së Kosovës suspendimin e një togeri policor respektivisht Komandantit të Stacionit Policor të Skenderajt.
Inspektorati Policor ka filluar hetim disiplinor nën dyshimin se i njëjti së bashku me vartësit e tij kanë kryer shkelje të rëndë disiplinore -“Sjellje e rëndë diskredituese”.
