Një pjesëtar i Policisë së Kosovës në Leposaviq është suspenduar nga detyra nën dyshimin se ka konsumuar lëndë narkotike në objektin e komunës.
Suspendimi i tij është bërë me rekomandim të Inspektoratit të Policisë, pas pamjeve të publikuara në media.
IPK ka bërë të ditur se ka filluar hetimet për këtë rast dhe se me autorizim të Prokurorisë kanë intervistuar zyrtarin e PK-së.
“IPK me autorizim të Prokurorisë Themelore në Mitrovicë tashmë ka intervistuar një zyrtar policor të Stacionit Policor në Leposaviq me dyshimin se i njëjti ka kryer veprën penale “Posedimi i paautorizuar i narkotikeve, substancave psikotrope ose analoge”. Në kuadër te hetimit dhe veprimeve tjera të natyrës administrative, IPK i ka rekomanduar Policisë së Kosovës masën e suspendimit të zyrtarit policor të dyshuar në këtë rast”, thuhet në komunikatë.
Nga pamjet e publikuara nga Nacionale, është parë duke konsumuar substanca narkotike edhe nënkryetarja e Leposaviqit e cila është shkarkuar të martë nga kryetari Lulzim Hetemi.
