Gjykata Supreme e Kosovës ka marrë një vendim të rëndësishëm në favor të veteranëve të Ushtrisë Çlirimtare të Kosovës, duke shfuqizuar nenin 14.A, paragrafi 1.5 të Udhëzimit Administrativ Nr.01/2025, i cili kufizonte të drejtën e tyre për kompensim financiar.
Kolegji i Gjykatës Supreme ka aprovuar kërkesëpadinë e paraqitur nga disa veteranë të luftës kundër Ministrisë së Financave, Punës dhe Transfereve, duke konstatuar se dispozita e kontestuar ishte në kundërshtim me ligjin dhe parimin e sigurisë juridike.
Ky udhëzim administrativ kufizonte të drejtën e veteranëve të Ushtrisë Çlirimtare të Kosovës për të përfituar kompensim financiar, në rastet kur ata ishin në marrëdhënie pune.
Sipas vendimit, Gjykata Supreme ka konstatuar se dispozita e kontestuar bie në kundërshtim me ligjin që rregullon statusin dhe të drejtat e dëshmorëve, invalidëve dhe veteranëve të UÇK-së. Gjatë shqyrtimit të çështjes, Gjykata ka vlerësuar se ndryshimet e fundit ligjore kanë krijuar paqartësi për kriterin e punësimit si kusht për përfitim.
Në interpretimin e saj, Gjykata ka sqaruar se e drejta për kompensim nuk varet nga fakti nëse veterani është apo jo në marrëdhënie pune, por nga burimi i financimit të pagës. Kështu, veteranët që punojnë jashtë institucioneve publike ose ndërmarrjeve që financohen nga buxheti i shtetit gëzojnë të drejtën për kompensim, në përputhje me kufijtë ligjorë.
Gjykata ka vlerësuar se kërkesa e Ministrisë që veteranët të paraqesin dokument nga Administrata Tatimore e Kosovës (ATK) që dëshmon se “nuk janë në marrëdhënie pune” është e paligjshme dhe në kundërshtim me rregullimin e ri ligjor.
Sipas vendimit, Ministria është e obliguar që të harmonizojë udhëzimet administrative me ligjin, për të siguruar përputhshmëri vertikale të akteve juridike dhe zbatim të drejtë të ligjit.
Gjykata ka theksuar se përcaktimi “nuk është në marrëdhënie pune” nuk mund të përdoret si kriter ligjor për kufizimin e së drejtës së veteranëve për përfitim financiar, për aq sa ata nuk paguhen nga buxheti i Republikës së Kosovës.
