Gjykata Supreme e Kosovës ka konstatuar se Paneli Zgjedhor për Ankesa dhe Parashtresa (PZAP) ka vepruar gabim kur e ka hedhur poshtë ankesën e kandidatit shqiptar për kryetar të Komunës së Kllokotit, Arbër Emini.
Në vendimin e saj, Supremja ka vlerësuar se (PZAP) nuk e ka trajtuar drejt natyrën e ankesës, duke theksuar se Emini ishte ankuar për parregullsi gjatë procesit të votimit, e jo për rezultatet preliminare siç ishte pretenduar nga Paneli.
Sipas aktvendimit të Gjykatës Supreme, nga përmbajtja e ankesës del qartë se Emini ka ngritur shqetësime për ndërhyrje të mundshme të Serbisë në procesin zgjedhor në Kllokot, përmes përdorimit të dokumenteve mjekësore të fabrikuara nga strukturat paralele serbe, të cilat, sipas tij, janë shfrytëzuar për të lejuar votimin me asistencë të personave që nuk kishin nevojë reale për ndihmë.
Në bazë të kësaj, Supremja ka urdhëruar PZAP-in që të rishqyrtojë rastin dhe të vendosë në mënyrë meritore, duke eliminuar shkeljet e evidentuara në vendimin e mëparshëm.
“PZAP udhëzohet që në rivendosje t’i evitojë shkeljet e theksuara dhe të vendosë në mënyrë meritore lidhur me ankesën e kandidatit të pavarur për kryetar të Komunës së Kllokotit, Arbër Emini”, thuhet në aktvendimin e Gjykatës Supreme.
Arbër Emini, i cili garoi si kandidat i pavarur dhe i vetmi shqiptar në garë, mori 518 vota, që përbëjnë 24 për qind të rezultatit total në zgjedhjet lokale të 12 tetorit në Kllokot.
Në vendin e parë doli Bozhidar Dejanoviq nga Lista Serbe me 41 për qind të votave (883 vota), ndërsa pas tij u rendit Sreçko Spasiq nga Srpska Narodna Sloga, me 31 për qind (673 vota).
