Gjykata Supreme ka hedhur poshtë ankesën administrative të Sami Kurteshit dhe Alban Krasniqit, e ushtruar kundër vendimit të PZAP-sw rreth certifikimit të Listës Serbe për zgjedhjet lokale të 12 Tetorit.
Sipas Supremes, Kurteshi dhe Krasniqi nuk kanë legjitimitet që të parashtrojnë ankesë në emër të tyre personalisht, pasi që nuk janë palë të drejtpërdrejta sipas vendimit të PZAP-së.
“Kjo për faktin se sipas vlerësimit të kolegjit të kësaj gjykate të drejtë për të paraqitur ankesë në Gjykatën Supreme ndaj vendimit të PZAP-it, përveç personave që kanë interes ligjor (të përcaktuar me paragrafin 1 të nenit 119), ka vetëm KQZ-ja, përkatësisht zyra e saj, ashtu siç është e përcaktuar me Ligjin për Zgjedhjet e Përgjithshme, përkatësisht nenin 119 paragrafi 2, e jo anëtarët individual të saj. Për më tepër, këta të fundit e shprehin mendimin e tyre gjatë procesit të vendimarrjes brenda KQZ-së, por nuk legjitimohen që të veprojnë si palë individuale në procedurë gjyqësore, siç është edhe rasti konkret.
Andaj, meqenëse nuk ka asnjë bazë ligjore që e lejon apo i jep të drejtë një anëtar individual të KQZ-së, që në cilësinë e anëtarit të jetë palë në procedurë gjyqësore në rastet kur eventualisht atakohen vendimet e KQZ-së, si institucion, atëherë Gjykata Supreme konstatoi se ankesa e parashtruar nga ankuesit, është e palejuar. Si rezultat i kësaj, edhe kolegji i kësaj gjykate nuk është lëshuar në shqyrtimin meritor të çështjes së ngritur me ankesë nga ankuesit”, thuhet nw vendim./teve1.info/
