Gjykata Supreme ka njoftuar se ka aprovuar kërkesat për mbrojtje të ligjshmërisë të paraqitura nga mbrojtësit e të pandehurve në çështjen penale ndaj B.B., A.H., A.K., Gj.Sh., L.K., B.Xh., E.G., dhe I.P., duke ndryshuar vendimet e shkallëve të mëparshme dhe duke ndërprerë masën e paraburgimit për të gjithë të pandehurit.
Sipas njoftimit zyrtar, vendimi i Supremes vjen pas shqyrtimit të kërkesave kundër aktvendimeve të Gjykatës Themelore në Prizren dhe të Gjykatës së Apelit të Kosovës, të cilat kishin caktuar dhe vërtetuar masën e paraburgimit për veprën penale të falsifikimit të rezultateve të votimit.
Të njëjtit janë liruar menjëherë për t’u mbrojtur në liri.
Gjykata Supreme gjithashtu ka aprovuar kërkesën për mbrojtje të ligjshmërisë të paraqitur nga mbrojtësi i të pandehurit H.P., duke ndërprerë masën e paraburgimit dhe duke e liruar për t’u mbrojtur në liri për të njëjtën vepër penale.
“Gjykata Supreme vlerësoi se janë përmbushur kushtet ligjore për ndërprerjen e masës së paraburgimit, duke garantuar respektimin e parimit të ligjshmërisë dhe të drejtave procedurale të të pandehurve”, theksohet në njoftim.
