Gjykata Supreme e Kosovës ka anuluar vendimet e Gjykatës Themelore në Prishtinë dhe të Gjykatës së Apelit për vazhdimin e paraburgimit ndaj Ramadan Morinës, i akuzuar për krime lufte në Malishevë, duke e kthyer çështjen në rivendosje.
Megjithatë, Supremja ka vendosur që Morina të mbetet në paraburgim derisa Themelorja të marrë një vendim të ri.
Themelorja më 6 nëntor ia kishte vazhduar paraburgimin Morinës për dy muaj, ndërsa Apeli e kishte konfirmuar këtë vendim më 2 dhjetor. Kundër këtyre vendimeve, mbrojtja e Morinës, përmes avokatit Arianit Koci, kishte paraqitur kërkesë për mbrojtje të ligjshmërisë, duke pretenduar shkelje procedurale dhe duke kërkuar zëvendësimin e paraburgimit me një masë më të lehtë.
Supremja ka vlerësuar se kërkesa për vazhdimin e paraburgimit nuk i ishte dorëzuar mbrojtjes në përputhje me nenin 188 të Kodit të Procedurës Penale, duke i konsideruar pretendimet e avokatit si të bazuara.
Ndërkohë, Prokuroria Speciale ka ngritur aktakuzë ndaj Morinës për “Krim lufte kundër popullsisë civile”, duke e akuzuar se më 31 mars 1999, në fshatin Burim të Malishevës, ka marrë pjesë në vrasjen e 34 civilëve shqiptarë, në bashkëkryerje me forca policore dhe ushtarake serbe.
