Kjo skenë ishte njëra prej skenave më të rënda nga ngjarjet e vitit 2023 në veri të vendit.
Në Zveçan, në perimetrin e ndërtesës së komunës, disa serbë të organizuar, përdorën dhunë ndaj pjesëtarëve të KFOR-it, duke i sulmuar ata me mjete të forta, shufra metalike, koktej motovi e armë zjarri.
Për pasojë u lënduan rreth 30 pjesëtarë të KFOR-it.
Organet e rendit, identifikuan njërin prej sulmuesve. Ai është Millosh Antoviq, ndaj të cilit Prokuroria Speciale më 30 korrik të këtij viti ngriti një aktakuzë.
Ai ngarkohet me katër vepra penale, si “sulm ndaj personit zyrtar”, “Pjesëmarrje në turmë që kryen vepër penale dhe huliganizëm”, “Blerja, posedimi, shpërndarja dhe shitja e paautorizuar e lëndëve narkotike” dhe “armëmbajtje pa leje”.
Për gjithë akuzat e Prokurorisë, Antoviq pranoi fajin.
Kështu, u arrit një marrëveshje për pranimin e fajësisë mes të pandehurit dhe Prokurorisë Speciale.
Si dënim unik, ky organ propozi dënim me burgim prej 5 vitesh dhe 20 mijë euro gjobë.
“Marrëveshja me të pandehurin është arritur me prezencën e avokatëve të tij, në zyrën e Prokurorisë Speciale. I pandehuri fillimisht është njoftuar për pasojat dhe benefitet e marrëveshjes për pranimn e fajësisë. I njëjti, pranimin e fajësisë e ka bërë me vullnet të lirë, pa shtrëngim apo ndonjë presion”, ka thënë Kodraliu.
Gjykata Themelore në Prishtinë, të hënën shpalli verdiktin e saj, duke e dënuar Antoviqin me afro 5 vite burgim.
“Dënimi unik për veprat si në aktin 1 dhe 2 të aktakuzës, ia shqipton dënimin unik prej 4 vitesh e 11 muaj burgim, dënim në të cilin do të llogaritet edhe koha e kaluar nën masën e paraburgimit. Për veprat si në aktin 3 dhe 4 të aktakuzës, i shqiptohet dënimi unik me gjobë në lartësinë prej 20 mijë euro”, është shprhur Kurtaj.
Përkundër që mori pjesë në shqyrtimin fillestar, Millosh Antoviq nuk ishte prezant në shpalljen e aktgjykimit.
