Me të përfunduar seanca e jashtëzakonshme për buxhetin në Prishtinë, u sulmua kryesuesi i kuvendit komunal, Fehmi Kupina.
Sipas burimeve të Tëvë1 , brenda partisë së Kupinës, ai u sulmua nga asamblisti i Lidhjes Demokratike të Kosovës, Sami Salihu.
Madje Kupina, gjatë së mërkurës mori edhe trajtim mjekësor për shkak që u gjuajt me shishe qelqi.
E nga Policia e Kosovës, informata është pranuar për rrahje të përfshirë 3 persona.
“Sot rreth orës 10:30 është pranuar informata për një rrahje në rrugën “UÇK” në Prishtinë. Me të marrë informatën policia, ka arritur në vendin e ngjarjes dhe ka shoqëruar 3 persona, të cilët ishin përfshirë në rast. Aktualisht policia po vazhdon punën për zbardhjen e rrethanave dhe motiveve që karakterizojnë ngjarjen”, u tha nga Policia.
Një version tjetër të kësaj ngjarje e kanë nga Lidhja Demokratike e Kosovës.
Asamblistja e LDK-së, Fiknete Bejta thotë se sulmi ndodhi nga persona të afër me kryesuesin e Kuvendit në drejtim të Salihut.
“Pas përfundimit të seancës së Kuvendit të Kryeqytetit, para objektit të Komunës së Prishtinës, ndodhi një akt i papranueshëm dhe i rëndë: u sulmua fizikisht asamblisti ynë, z. Sami Salihu. Ky sulm, i kryer nga djali dhe persona të afërt me kryesuesin e Kuvendit, z. Fehmi Kupina, është jo vetëm një dhunë e paprecedentë ndaj një përfaqësuesi të qytetarëve, por edhe një goditje e rëndë ndaj demokracisë, institucioneve dhe dinjitetit të Kuvendit të Kryeqytetit. Ne Grupi i Asambleistëve të LDK-së, e dënojmë fuqishëm këtë akt të shëmtuar, që synon të frikësojë dhe të nënshtrojë zërin e lirë politik”, tha ajo.
Për dhunën ndaj Kupinës reagoi edhe kandidati i Vetëvendosjes për të parin e kryeqytetit, Hajrullah Çeku duke e quajtur shqetësues aktin.
“Lidhja Demokratike e Kosovës sot sulmoi njeriun që udhëheqë me Kuvendin Komunal, z. Fehmi Kupina. Përveç që e papranueshme, kjo sjellje shkon kundrejt parimeve politike ku dallimet në pikëpamje janë vlerë e shtuar”, tha Çeku.
Sulmin ndaj Kupinës e kanë dënuar edhe Partia Demokratike e Kosovës.
Pas ngjarjes, Sami Salihu ka reaguar publikisht përmes një postimi në Facebook, duke mohuar akuzat se ka sulmuar me shishe.
Salihu u kërkoi falje familjes, qytetarëve dhe shoqërisë për shqetësimin e krijuar, duke theksuar se situata e sotme ishte pasojë e provokimeve dhe ofendimeve ndaj tij;
“Reagim!Nuk kam sulmuar askënd me shishe.Sot u sulmova papritmas dhe reagova vetëm për t’u mbrojtur. Kamerat e vendit të ngjarjes do ta tregojnë të vërtetën dhe unë do të bashkëpunoj plotësisht me organet hetimore. Dhuna, sidomos ajo pas shpine, është e papranueshme.Ju kërkoj falje familjarëve të mi, shoqërisë dhe mbi të gjitha qytetarëve që janë shqetësuar nga kjo situatë. Kjo nuk është natyra ime dhe nuk pasqyron as vlerat që përfaqësoj. Ajo që ndodhi ishte pasojë e provokimeve, ofendimeve dhe sulmit të padrejtë ndaj meje.Unë do të vazhdoj të qëndroj drejt, me dinjitet dhe me përkushtim ndaj qytetarëve që më kanë besuar. Askush nuk ka të drejtë të godasë pas shpine, dhe askush nuk do të më ndalë të punoj me përgjegjësi për Prishtinën.”, ka shkruar Salihu.
