Përfaqësuesja e lartë e BE-së për Politikë të Jashtme dhe Siguri, Kaja Kallas, ka reaguar pas sulmit të ShBA-së në Venezuelë.
Përmes një postimi në X, Kallas ka bërë të ditur se ka biseduar me Sekretarin amerikan të Shtetit, Marco Rubio, dhe Ambasadorin e BE-së në Karakas, duke theksuar se Bashkimi Evropian po e monitoron nga afër situatën në vend.
“Kam folur me Sekretarin e Shtetit Marco Rubio dhe Ambasadorin tonë në Karakas. BE-ja po e monitoron nga afër situatën në Venezuelë”, ka shkruar ajo.
Kryediplomatja ka rikujtuar se Bashkimi Evropian ka deklaruar vazhdimisht se zotit Maduro i mungon legjitimiteti dhe ka mbrojtur një tranzicion paqësor në vend.
“BE-ja ka deklaruar vazhdimisht se zotit Maduro i mungon legjitimiteti dhe ka mbrojtur një tranzicion paqësor. Në të gjitha rrethanat, parimet e së drejtës ndërkombëtare dhe Karta e OKB-së duhet të respektohen. Ne bëjmë thirrje për përmbajtje”, ka shtuar Kallas.
Ajo gjithashtu ka theksuar se siguria e qytetarëve të BE-së në Venezuelë mbetet përparësia kryesore e Bashkimit Evropian.
“Siguria e qytetarëve të BE-së në vend është përparësia jonë kryesore”, ka përfunduar Kallas.
