Drejtoria Rajonale e Policisë në Prizren së bashku me Inspektoratin Policor të Kosovës kanë suspenduar një rreshter policor i cili nuk ka reaguar gjatë kohës kur është sulmuar ekipi i gazetës Nacionale gjatë protestës në Prizren.
Lajmin teve1.info e ka konfirmuar koloneli i Policisë për rajonin e Prizrenit, Shaqir Bytyçi, i cili tha se hetimet janë duke vazhduar për rastin për të parë edhe veprimet e zyrtarëve tjerë policore.
“Ai eshte suspenduar per 72 ore, ne konsultim me Drejtorinë Rajonale në Prizren dhe IPK-ne. Rreshteri ishte zyrtari i parë që gazetari i është drejtuar dhe gjatë këtij kontakti dyshohet se nuk ka pasur një reagim dhe sjellje profesionale nga ai. Tani vetëm ai është suspenduar, por hetime do të këtë në përgjithësi për ngjarjen për të parë se cfarë ka pasur shkelje edhe për zyrtarët tjerë…do të shikohet për secilin veç e veç”, ka deklaruar ai.
Gazetari i Nacionales, Vullnet Krasniqi dhe kameramani, Arber Latifi janë sulmuar fizikisht nga disa persona.
Krasniqi ka informuar redaksinë e Nacionales se përveç sulmit ndaj ekipit në terren, janë goditur edhe kemerat dhe mikrofoni i Nacionales.
Ky ështe sulmi i 54 ndaj gazetarëve dhe kameramanëve këtë vit, sipas faqes së AGK-së. Në vitin 2020, Kosova kishte regjistruar 24 sulme.
