Sulmi i befasishëm i Izraelit në Gaza që ndodhi në orët e hershme të së martës, shkatërroi një përiudhë qetësie relative gjatë muajit të shenjtë të Ramazanit.
Deri më tani janë vrarë të paktën 326 palestinezë, sipas Ministrisë së Shëndetësisë në Gaza.
Në mesin e të vrarëve nga sulmet vdekjeprurëse janë edhe “gra, fëmijë dhe të moshuar” me disa “familje të tëra” të zhdukura.
Një numër viktimash kanë mbetur ende nën rrënoja, në përpjekje për t’i tërhequr.
Izraeli ka kërcënuar banorët e disa zonave në Gaza që të evakuohen menjëherë”, duke thënë se lagjet e tyre do të bëhen “zona të rrezikshme ushtarake”.
Sulmet ajrore të koordinuara të Izraelit kanë targetuar ndërtesa banimi, shkolla dhe hapësira publike që ishin kthyer në qendra evakuimi, raporton Al Jazeera.
Hamasi ka deklaruar se Izraeli kreu një sulm “të pabesë” ndaj civilëve të rrethuar dhe të pambrojtur me qëllim që të përmbyste armëpushimin e Gazës.
Kryeministri izraelit ka thënë se ka urdhëruar sulmet për shkak të mungesës së përparimit në bisedimet për zgjatjen e armëpushimit.
Mirëpo, Ministri izraelit i Financave disa javë më parë kishte thënë se taktika që Izraeli do të ndjekë është që të parashtrojë një propozim që Hamasi thjesht nuk mund ta pranojë dhe kështu të rifillohet lufta.
Mediat izraelite raportojnë se vendimi për të kryer këtë sulm është marrë një javë më parë, ndaj sulmi nuk ishte i bazuar në një zhvillim së fundmi në terren.
Kurse grupi kryesor që reprezenton familjet e pengjeve që mbahen në Gaza nga Hamasi, ka akuzuar qeverinë e Netanyahut se “kanë zgjedhur të heqin dorë nga pengjet” pas atakeve të fundit të ushtrisë izraelite.
“Ne jemi të tmerruar, të zemëruar dhe të frikësuar nga shaktërrimi i qëllimshëm I procesit të kthimit të të dashurve tanë nga Hamasi” thonë në një deklaratë që citohet nga The Times of Israel.
Pas sulmit ka reaguar edhe sekretari i Përgjithshëm i Kombeve të Bashkuara, António Guterres i cili ka thënë se është “i tronditur” nga sulmet ajrore izraelite në Gaza dhe ka bërë thirrje që të respektohet armëpushimi në Gaza.
Dëshmia e kryeministrit izraelit, Benjamin Netanyahu në një gjyq për korrupsion kundër tij është shtyrë për shkak të luftimeve në Gaza, raporton gazeta izraelite Maariv.
