Një sulm i madh rus me dron dhe raketa në Ukrainë vrau katër persona dhe plagosi të paktën 27 të tjerë, thanë zyrtarët ukrainas të martën, raporton AP.
Forcat ajrore të Ukrainës thanë se Rusia qëlloi pothuajse 400 dronë me rreze të gjatë veprimi drejt Ukrainës gjatë natës, në sulmin e saj më të madh në javë. Sulmi vazhdoi deri të martën në mëngjes ndërsa dhjetëra dronë shënjestruan kryeqytetin Kiev gjatë ditës.
Rusia gjithashtu lëshoi 23 raketa kruiz dhe shtatë raketa balistike drejt Ukrainës gjatë natës, duke goditur të paktën 10 vende në të gjithë vendin, sipas forcave ajrore.
Komandanti i Përgjithshëm i forcave të armatosura të Ukrainës, gjenerali Oleksandr Syrskyi, tha se trupat ruse në ditët e fundit kanë bërë përpjekje të njëkohshme për të thyer linjat mbrojtëse në disa zona strategjike.
Instituti për Studimin e Luftës, një organizatë kërkimore me seli në Uashington, tha se raporti i Syrskyit mbështet vlerësimin e tij se ofensiva pranverore-verore e Rusisë është tani në zhvillim e sipër.
