Fundvitin e kaluar, Kosova ishte cak i sulmeve kibernetike.
Sipas ekspertëve të fushës, sulmet kishin ardhur si shkak i situatës së tensionuar në pjesën veriore të vendit.
E tash pas ngjarjeve të 24 shtatorit, po vlerësohet se rreziku i sulmeve kibernetike është i pranishëm.
Andaj eksperti Tanzer Abazi, po shtron nevojën për një koordinim institucional në mënyrë që të ngriten kapacitetet për të marrë masa parandaluese.
“Historia na ka tregu që sahere ka pas ndonjë konfrontim, kauzë apo problem politik, gjithëmonë është bashkëngjit ndonjë sulm kibernetik nga organet e po ashtu edhe individ të atyre shteteve konfrontuese nga grupe të pavarura dhe nga hakerë të sponsorizuar të shtetit. Kosova gjatë konfrontimit në veri që ka pas, gjithashtu ka pasur sulme kibernetike në vitin e kaluar ku shumica e institucioneve shtetërore, duke përfshi edhe mediat kanë qenë cak i sulmeve kibernetike që ne i thojmë ndalje e shërbimeve apo ndaljes së operimit që mos me qenë të qasshme ato për qytetarët”, tha eksperti i sigurisë, Tanzer Abazi.
Kosova po konsiderohet se ka fuqi të vogël për tu mbrojtur nga këto sulme.
Eksperti i çështjeve kibernetike, Kastriot Fetahaj, thotë se për këtë situatë, një ndër arsyet kryesore është paga e ulët.
“Është numër shumë i vogël, edhe duke e pa standardin e punëve në institucione shtetërore, duke pa draftin e ligjit të pagave, duke pa entuziasmin e të rinjve për të punuar në institucione shtetërore, neve nuk na lë shumë entuziastë që kjo mundet me u rregullu shumë shpejtë. Për arsye se me ligjin e ri të pagave, paga që pretendohet për një ekspert të sigurisë kibernetike është 1/3 e asaj që e merr në privat”, tha eksperti i sigurisë kibernetike, Kastriot Fetahaj.
Siguria kibernetike nuk është përfshirë në Strategjinë e Sigurisë Kombëtare 2022-2027 në Kosovë.
Në këtë dokument, ky term përmendet vetëm një herë në pjesën për transformimin digjital.
