Sulmet e reja izraelite kanë vrarë të paktën 42 persona në gjithë Rripin e Gazës që nga mëngjesi i së hënës , kanë thënë burimet mjekësore për Al Jazeera.
Sulmet po vazhdojnë teksa po mbahen seancat dëgjimore në Gjykatën Ndërkombëtare në Hagë, ku po prezantohen faktet kundër bllokimit të ndihmës humanitare në Gaza, si shkelje e ligjit ndërkombëtar.
Në anën tjetër, Mbrojtja Civile Palestineze thotë se autoambulancat në jug të Gazës kanë mbetur pa karburant, me tetë nga 12 automjete jashtë funksionit në mes të një bllokade të vazhdueshme izraelite ndaj ndihmës humanitare.
Në një deklaratë, ajo paralajmëroi se vetëm me katër automjete, përgjigjet e saj ndaj banorëve do të jenë të kufizuara, “duke kërcënuar jetën e qindra mijëra qytetarëve dhe personave të zhvendosur në strehimore”.
“Ne ripërtërijmë thirrjen tonë drejtuar Zyrës së Kombeve të Bashkuara për Koordinimin e Çështjeve Humanitare dhe organizatave ndërkombëtare për të ndërmarrë veprime të menjëhershme për të hapur vendkalimet në Rripin e Gazës, për të lejuar hyrjen e karburantit dhe për të furnizuar institucionet dhe pajisjet që punojnë në fushën humanitare”, ka thënë ajo.
Të paktën 52,314 palestinezë janë konfirmuar të vrarë dhe 117,792 të plagosur në luftën e Izraelit në Gaza që kur filloi 18 muaj më parë.
