Sulmet izraelite në Rripin e Gazës kanë vrarë të paktën 51 palestinezë brenda 24-orëshit të fundit, kanë thënë zyrtarë lokalë shëndetësorë.
Një deklaratë e ministrisë tha se 113 persona të tjerë të plagosur u transferuan gjithashtu në spitale, duke e çuar numrin e të plagosurve në 117,905 në sulmet izraelite, raporton Anadoly.
“Shumë viktima janë ende të bllokuara nën rrënoja dhe në rrugë, pasi ekipet e shpëtimit nuk janë në gjendje t’i arrijnë”, shtoi ajo.
Izraeli ka kryer sulme të përditshme në Gaza që kur i dha fund armëpushimit me Hamasin muajin e kaluar. Që nga fillimi i marsit, Izraeli u ka ndërprerë 2 milionë palestinezëve të territorit të gjitha importet, përfshirë ushqimin dhe ilaçet.
Gjykata më e lartë e Kombeve të Bashkuara filloi të mbajë seanca dëgjimore të hënën mbi detyrimin e Izraelit për të lehtësuar ndihmën humanitare në territoret që pushton. Izraeli thotë se Gjykata Ndërkombëtare e Drejtësisë është e anshme kundër tij. Ai thotë se gjatë armëpushimit ka hyrë ndihmë e mjaftueshme për të mbështetur popullsinë dhe akuzon Hamasin se e ka përvetësuar atë.
Punonjësit humanitarë thonë se furnizimet po pakësohen jashtëzakonisht shumë, me shumicën e njerëzve që hanë një vakt ose më pak në ditë. Ata thonë se OKB-ja monitoron nga afër shpërndarjen e ndihmave dhe mohon çdo devijim të rëndësishëm.
Ministria e Shëndetësisë thotë se 2,151 persona, përfshirë 732 fëmijë , janë vrarë që kur Izraeli prishi armëpushimin më 18 mars.
Lufta e Izraelit në Gaza, që nga fillimi i saj, ka vrarë mbi 52,000 palestinezë, kryesisht gra dhe fëmijë, sipas Ministrisë së Shëndetësisë.
Në nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
