Sulmet e reja izraelite në Gaza kanë lënë të vrarë së paku 14 persona, kryesisht gra dhe fëmijë, dhe kanë shkatërruar buldozerë dhe paisje të rënda që ishin dhuruar nga ndërmjetësit për të pastruar rrrënojat.
Territori tashmë kishte mungesë të pajisjeve të rënda, të cilat nevojiten gjithashtu për të shpëtuar njerëzit nga rrënojat pas sulmeve izraelite dhe për të pastruar rrugët jetike.
Një komunë në zonën Jabaliya të Gazës veriore tha se një sulm në garazhin e saj të parkimit shkatërroi nëntë buldozerë të siguruar nga Egjipti dhe Katari, të cilët ndihmuan në ndërmjetësimin e armëpushimit që u mbajt në janar, raportoi AP.
Sulmet shkatërruan gjithashtu një cisternë uji dhe një gjenerator të lëvizshëm të siguruar nga grupet e ndihmës dhe një kamion të përdorur për të pompuar ujërat e zeza, tha komuna Jabaliya al-Nazla.
Mbrojtja Civile e Gazës ka dënuar Izraelin për shënjestrimin e buldozerëve të përdorur në operacionet humanitare, duke përfshirë heqjen e rrënojave dhe gjetjen e trupave.
“Një marrëveshje ishte arritur më parë me komitetin e Katarit dhe atë egjiptian, në lidhje me vendndodhjen e strehimoreve të buldozerëve,” tha zyrtari i Mbrojtjes Civile, Mohammed el-Mougher duke vënë në dukje se koordinatat e tyre ishin ndarë me Izraelin.
El-Mougher e përshkroi sulmin si një “shkelje të qartë” të ligjit ndërkombëtar që mbron pajisjet e shpëtimit civil. “Kjo zonë nuk ishte shpallur nga pushtimi izraelit si zonë evakuimi apo rreziku ushtarak”, tha ai, raporton Al Jazeera.
Izraeli i dha fund armëpushimit muajin e kaluar , duke rinovuar bombardimet dhe operacionet tokësore dhe duke mbyllur 2 milionë palestinezët e territorit nga të gjitha importet, duke përfshirë ushqimin, karburantin dhe furnizimet mjekësore.
