Sulmet ajrore të kryera nga Izraeli mbi infrastrukturën jetike civile në Jemen kanë rritur rrezikun e një katastrofe humanitare të thelluar, paralajmëroi të enjten organizata humanitare ndërkombëtare Mjekët pa Kufij (MSF).
Sipas të dhënave të Ministrisë së Shëndetësisë së Jemenit, të paktën shtatë persona humbën jetën dhe 97 të tjerë u plagosën gjatë bombardimeve ajrore mbi portin e Hodeidës më 5 maj dhe aeroportin e Sanaas më 6 maj.
Në një deklaratë zyrtare, MSF theksoi se këto sulme kanë dëmtuar rëndë infrastrukturën civile në një vend që prej më shumë se dhjetë vitesh vuan nga lufta dhe dhuna e vazhdueshme, raporton Anadoly.
“Pasojat më të rënda të këtyre akteve i përjetojnë civilët, të cilët tashmë po vuajnë nga mungesa e ndihmës dhe shërbimeve jetike,” thuhet në deklaratën e MSF.
Dennis Habaasa, drejtuesi i misionit të MSF-së në Jemen, nënvizoi se përshkallëzimi i dhunës kërcënon seriozisht furnizimin me ndihma dhe qasjen ndaj kujdesit shëndetësor, veçanërisht në veri të vendit.
“Rrezikojmë një katastrofë humanitare, pasi ndërprerja e furnizimeve dhe vështirësitë për të arritur në shërbime shëndetësore mund të jenë fatale për miliona njerëz,” paralajmëroi Habaasa.
MSF shtoi se tashmë po has vështirësi të mëdha në shpërndarjen e ndihmave në rajonet veriore, dhe theksoi se dëmtimi i aeroportit të Sanaas dhe portit të Hodeidës — të cilat janë pika kyçe për hyrjen e ndihmave — do të ketë pasoja shkatërrimtare.
Organizata kërkoi që civilët dhe infrastruktura e tyre të mbrohen dhe që ndihma humanitare — ushqime, ilaçe, karburant dhe produkte të tjera thelbësore — të lejohet të hyjë pa pengesa në vend.
Miliona qytetarë jemenas janë ende në nevojë të dëshpëruar për ndihmë, ndërkohë që konflikti i vazhdueshëm vetëm sa po përkeqëson krizën humanitare në vend.
