Një burrë i dyshuar për vrasjen e një besimtari mysliman në një xhami në jug të Francës ishte ende në arrati të dielën, thanë autoritetet, në një incident të përshkruar nga kryeministri francez, Francois Bayrou si “islamofobik”.
Të dy burrat ishin vetëm në xhaminë në ish-qytetin minerar La Grand Combe të premten kur viktima u godit me thikë për vdekje. Sulmuesi e regjistroi sulmin në telefonin e tij dhe pamjet e kamerave të sigurisë treguan se ai bërtiste duke fyer “Allah”, thanë media lokale.
“Racizmi dhe urrejtja e bazuar në fe nuk do të kenë kurrë vend në Francë”, tha presidenti francez Emmanuel Macron. “Liria fetare është e pacenueshme.”
Grini tha se imazhet e goditjes me thikë që ai pa si pjesë e hetimit ishin “të tmerrshme” dhe se forcat e policisë po punonin pa pushim për të arrestuar të dyshuarin, me 70 hetues të vendosur, raporton AP.
“Ne jemi veçanërisht vigjilentë për t’u siguruar që ai të mos pretendojë më viktima,” tha Grini.
Ai shtoi se i dyshuari është një burrë i lindur në Francë në vitin 2004, i cili jetonte në këtë zonë dhe nuk kishte precedentë penalë.
Xhamia e Madhe e Parisit dënoi sulmin në një deklaratë dhe tha se viktima sapo kishte përfunduar pastrimin e xhamisë kur u vra.
