Tre persona janë arrestuar në Pejë nën dyshimin se kanë kërcënuar dhe sulmuar fizikisht një burrë, ka njoftuar Policia e Kosovës.
Sipas autoriteteve, incidenti ka ndodhur mbrëmjen e së dielës, pas një mosmarrëveshjeje ndërmjet palëve.
Të dyshuarit, dyshohet se kanë kanosur viktimën me sëpatë dhe i kanë shkaktuar lëndime të lehta trupore.
Njësitet policore kanë dalë në vendin e ngjarjes, ku kanë konfiskuar sëpatën, e cila dyshohet se është përdorur gjatë incidentit.
Me vendim të prokurorit të shtetit, pas intervistimit, të dyshuarit janë dërguar në mbajtje, ndërsa rasti po hetohet në procedurë penale.
“Janë arrestuar tre të dyshuar meshkuj kosovarë pasi që, të njëjtit pas një mosmarrëveshje kanë kanosur dhe sulmuar viktimën mashkull kosovar. Në vendin e ngjarjes kanë dalur njësitet përkatëse me ç’rast kanë konfiskuar një sëpatë që dyshohet të jetë përdorur në rast. Me vendim të prokurorit, pas intervistimit të dyshuarit dërgohen në mbajtje”, thuhet në raportin ditor të PK-së. /teve1.info/
