Sveçla këtë sulm e quajti akt terrorist, teksa theksoi se zyrtarët policorë janë sulmuar me granatë dore dhe AK-47, shkruan teve1.info
“Sot rreth orës 07:40 ka ndodhur një sulm ndaj Policisë së Kosovës, të cilët kanë qenë duke shkuar për të realizuar ndërrimin në pikat kufitare. Ky sulm tashmë i faktuar me granatë dore dhe AK-47 si një akt terrorist, është bërë me qëllim të frikësimit të zyrtarëve policorë por edhe të gjithë qytetarëve të Kosovës. Grupe të ndryshme në tre ditët e fundit kanë realizuar katër sulme në atë zonë”, tha Sveçla në një konferencë për media.
Tutje, ai shtoi se të gjitha njësitet policore janë të angazhuara që të zbulojnë gjithçka lidhur me këtë rast.
“Unë them se qëllimi i institucioneve të Kosovës për të vendosur rend e ligj, për të luftuar krimin e organizuar dhe korrupsionin pa kurrfarë dallimi, pa kurrfarë diskriminimi të çfarëdo lloj kategorie do të vazhdojë edhe më me ngulm. Ne do të jemi të suksesshëm në të drejtën tonë dhe paniku i palës tjetër, të cilët ky qëllim është duke iu prishur planet, ne as nuk na ndalë po as nuk na tremb. Të gjitha njësitë policore janë të angazhuara që të zbulojnë gjithçfarë ka ndodhur në këto raste dhe unë jam shumë optimist edhe bazuar në praktikat e deritanishme, që shumë shpejt Policia e Kosovës do të vjen me rezultate konkrete për sa i takon pjestarëve të këtij grupi terrorist që ka shkaktuar këto sulme”, u shpreh ministri Sveçla. /Teve1.info/
