“Në një mijë banorë duhet të jetë një zjarrfikës, kështu që i bie që Suhareka t’i ketë rreth 30-40 zjarrfikës, kurse ne jemi gjithsej 11 zjarrfikës. Është numër shumë i vogël i zjarrfikësve”.
Kështu thotë komandanti i zjarrfikësve në Suharekë, Vehnbi Krasniqi.
Për shtim të stafit, zjarrfikësve të Komunës së Suharekës u është shtuar nevoja edhe pas largimit të stafit ekzistues disa vite më parë.
“Një e ka lëshuar punën vullnetarisht dhe tre të tjerë janë pensionuar, por vendet e tyre nuk janë plotësuar për pothuajse që 3-4 vite. Nuk kanë hap konkurs. Si komandant i drejtohem Agjencionit për Menaxhimin e Emergjencave vazhdimisht për një kërkesë të tillë, por nuk ka diçka”, tha Krasniqi.
Për mosadresim të kërkesës për plotësim stafi, ky Agjencion nuk iu është përgjigjur as pyetjeve të televizionit.
E përkundër numrit të paktë të personelit, zjarrfikësit e Suharekës qëndrojnë mirë me makineri, ani pse jo me vend adekuat për parking.
“Kemi pajisje të ndryshme, si ato për zjarre fushore, për zjarre malore, kemi automjete për aksidente komunikacioni. Domethënë sa i përket teknikës jemi mirë të pajisur, por edhe pajisjet nuk na duhen nëse nuk ka kush i drejton ato”, tha ai.
Megjithatë, vlerësohet se pajisje të tilla nuk kanë të gjithë zjarrfikësit në nivel vendi.
Kështu që, kërkohet që t’iu kushtohet vëmendje kësaj kategorie.
“Ata gjithmonë pothuajse interevenojnë me kohë dhe e kryejnë punën e tyre në mënyrë profesionale. Por, gjithsesi që kushtet dhe pajisjet e tyre lënë për të dëshiruar. Andaj duhet që të punohet që në të ardhmen, t’iu plotësohen këto kërkesa, pra kushtet dhe pajisjet t’i kenë më të mira, në mënyrë që kur të intervenojnë të jenë sa më efikas në mbrojtjen e pronës së qytetarëve dhe jetëve të tyre2, tha njohësi i emergjencave, Tahir Ahemti.
Së fundi, vetëm në Suharekë ishin tre vatra të zjarreve, që kanë çuar në teren ekipet për fikje të zjarrit.
