Në Suedi e kanë përjetuar rëndë humbjen 2:0 nga Kosova, të hënën mbrëma në Prishtinë në kuadër të kualifikimeve për Botërorin 2026.
Gazeta e njohur “Sportbladet” ka shkruar se Suedia po tallet nga të gjitha vendet fqinje pas humbjes.
Kjo gazetë ka paraqitur disa prej shkrimeve të mediave në vende si Norvegjia, Danimarka e Finlanda, si dhe ka shkruar se Suedia po tallet nga e gjithë bota.
“Fiasko e madhe. Atmosferë funerali në Suedi” dhe “Një brengë e madhe për Suedinë është që nuk ishte fitore me fat e Kosovës”, kanë shkruar disa medium finlandeze.
“Shuplakë në fytyrë për Suedinë në kualifikimet për Botëror”, ka shkruar një medium në Norvegji, kurse në Danimarkë titulli ishte “Jon Dahl dhe Suedia janë turpëruar nga Kosova”.
Pas dy ndeshjeve të luajtura në kuadër të Grupit B kualifikues, Suedia ka tubuar vetëm një pikë, dy më pak se Kosova.
