Trajneri i suksesshëm suedez, Jesper Ostlund, e ka shpallur të martën listën e parë si selektor i Kombëtares së Kosovës në hendboll.
Prejse, u zyrtarizua në postin e selektorit, më datën 2 shtator, Ostlund ka nisur punën për përzgjedhjen e ekipit dhe po ashtu për përgatitje sa më të mirë të ndeshjeve me Britaninë e Madhe.
Ai ka vëzhguar numër të madh lojtarësh, ndërsa të martën përzgjodhi 18 prej tyre, që grumbullohen të dielën, ka shkruar Federata e Hendbollit të Kosovës (FHK).
Ostlund është i entuziazmuar që po e fillon punën në krye të Kosovës, ndërsa do të asistohet nga Jasmin Zhuta.
Në një intervistë për faqen zyrtare të Federatës së Hendbollit të Kosovës, selektori Ostlund ka folur kryesisht për listën e lojtarëve, të cilën e publikoi të martën.
“Do ta fillojmë javën e ndeshjeve ndërkombëtare me shumë energji dhe na duhet që t’i vendosim gjërat në vend shumë shpejt. Do të jetë një përbërje e re si në sulm ashtu edhe në mbrojtje, që kërkon shumë nga lojtarët, nga unë dhe nga Jasmin Zhuta. Kemi dy debutues në lojtarët e vijës, përkatësisht në pozitën e pivotit. Bëhet fjalë për Muhamet Durmishin dhe Ardit Tafilajn. Ata janë paraqitur mirë për skuadrat e tyre dhe do të futen direkt në zjarrë. Debutues, por me shumë përvojë, është Gzim Salihi. Atë e njoh shumë mirë nga koha që e kam në ligën suedeze”, tha selektori Ostlund.
Megjithatë, Kosova ndaj Britanisë së Madhe do të ketë edhe mungesa të shumta.
“Kemi disa lojtarë që mungojnë për arsye të ndryshme: Valon Dedaj, Luigj Quni, Kushtrim Ninaj, Kastriot Jupa janë jashtë. Bujar Ramosaj po ashtu do të mungojë në ndeshjen e parë, ndërsa duhet ta shohim deri në fund gjendjen e Egzon Gjukës dhe Salihit, që pësuan lëndime të vogla në ndeshjet e fundit. Mungesat natyrisht do të kenë ndikim në forcën e skuadrës. Por për mua është e rëndësishme që lojtarët tjerë të marrin më shumë përgjegjësi, brenda dhe jashtë fushës”, ka theksuar selektori Ostlund.
Ai me padurim pret të takohet me lojtarët.
“Janë dy ndeshje të para interesante për mua dhe për ekipin. Do të takojë lojtarët për herë të parë dhe do të punojmë shumë për të arritur synimin për të avancuar në raundin tjetër. Kemi pak stërvitje para ndeshjes së parë dhe duhet të jemi të saktë në atë që vendosim dhe të zhvillojmë sa më shpejtë atë që ekipi do të luajë. Britania e Madhe është ekip me shumë lojtarë të mirë kështu që do të jetë sfidë për ne”, thotë Jesper Ostlund.
