Po bëhen gati 4 muaj që kur komuna e Prishtinës ka nisur të mbështesë nënat lehona me asistencë sociale, me një shumë prej 500 eurosh pas çdo lindje.
E përgjatë kësaj periudhe kanë aplikuar vetëm 7 nëna lehona. Kjo iniciativë është ndërmarrë me qëllim për të forcuar pozitën financiare të gruas në shoqëri.
Drejtoresha e Mirëqenies Sociale në Komunën e Prishtinës, Adelinë Sahiti tregon kriteret bazë që një nënë lehonë duhet t’i përmbush që të jetë përfituese e skemës sociale.
“Ne tanimë vetëm kemi bërë njoftimin për të gjitha lehonat që janë përfituese e skemës sociale rreth kritereve që ato duhet të i mbushin për të qenë përfitues i kësaj ndihmese që po u jep Komuna e Prishtinës, dhe dokumentët që ato duhet të i kenë kur ta bëjnë veqëse aplikimin. Kriteret janë të thjeshta duhet të jetë banore e komunës së Prishtinës duhet të jetë pjesë e regjistrave në Komunën e Prishtinës, përfituese e skemës sociale dhe duhet ta ketë fëmiun të lindur nga data 1 janar 2022 e tutje”, tha Sahiti.
Sahiti thotë se Komuna e Prishtinës synon që me këtë mbështetje të vazhdoj edhe vitin e ardhshëm.
“Ne kemi filluar të pranojmë aplikime nuk kemi një numër të saktë të cilin mund ta japim tani por jemi të hapur gjatë gjithë kohës nuk kemi ndonjë limit kohor përgjatë kësaj kohe prandaj ne synojmë që ta kemi dhe në vitin e ardhshëm në qeverisjen tonë”, tha tutje ajo.
Në bazë të kalkulimeve të prezantuara në Kuvendin Komunal të Prishtinës, brenda një viti rreth 70 nëna lehona do jenë përfituese të kësaj skeme ose në kosto financiare që i bie 35 mijë euro.
Kronikë e realizuar nga gazetarja Lendrina Kodrolli