Të hënën, nxënësit në Kosovë pritet të fillojnë vitin e ri shkollor.
E për të përgatitur fëmijët e tyre për proces mësimor, prindër të shumtë ia kanë mësyer librarive në vend.
Por shuma e ndarë nga Ministria e Arsimit po del të jetë e pamjaftueshme për blerjen e librave e materialeve mësimore.
“Fatkeqësisht nuk janë të mjaftueshme me kompletu komplet, pasi Ministria zotohet që edhe për fletore do të thotë se kemi me qit të hollat a në realitet vetëm pagesën e librave e ka bërë pasi librat kushtojnë 112 euro komplet”, tha prindi, Edmond Paqarizi.
Por për dikë tjetër kjo shumë është e mjaftueshme.
“Mjaftojnë sa dush, përafërsisht mu më kanë kushtuar 50 e diçka euro”, u shpreh prindi, Arbër Berisha.
Mënyra e subvencionimit të teksteve shkollore ka krijuar edhe probleme të tjera.
Kjo pasi nxënësit e klasës së gjashtë deri në të nëntën do të mësojnë me libra të cilat janë të përdorura nga gjenerata e vitit të kaluar.
“Në qoftë se librat janë kësisoj të dëmtuar atëherë nuk ka mundet të jetë efektiv por fatmirësisht hasim në mirëkuptimin e prindërve, e di që është një kosto e madhe për ta mirëpo detyrimisht duhet që t’i sigurojnë”, deklaroi sekretari i shkollës “Daut Bogujevci”, Betim Ahmeti.
Kundër kësaj forme të subvencionimit të teksteve shkollore kanë dalë edhe nga Sindikata e Bashkuar e Arsimit.
“Edhe alokimi i jetëve në xhirollogaritë e prindërve është bërë më vonesë, pavarësisht shifrës 100 mijë e sa mijë,dhe kemi frikën deri të merren mjetet të shkohet e të bëhen rreshtat para librarive, kemi frikën së do të na përsëritën telashet e vitit të kaluar dhe do të shtatori do të na shkojë me telashe për tekste shkollore”, tha kryetari i SBAShK-ut, Rrahman Jasharaj.
Këtë vendim të MASHTI-t po e sheh të gabuar edhe njohësi i çështjeve të arsimit, Argjend Osmani.
“Hapi që ka ndërmarrë qeveria që të kthejë furnizimin me shumicë në furnizim me pakicë është një hap krejtësisht i gabuar. Të jemi të qartë se sipas parimeve bazë të ekonomisë çdo blerje që është me shumicë ka çmimin dhe ka kushtet e veta shumë më të favorshme se sa çmimet me pakicë. Problemet që janë shfaqur në lidhje me zinxhirin furnizues, në lidhje me përzgjedhjen e librave dhe problemet e tjera që ndërlidhen me këtë proces e kanë vështirësuar edhe më tej gjendjen në arsim”, u shpreh eksperti i arsimit, Argjend Osmani.
MASHTI ka vendosur që këtë vit të subvencionojë me nga 80 € për nxënësit nga klasa I deri në klasën V, për blerjen e teksteve dhe materialeve mësimore dhe 80 € për nxënësit nga klasa VI deri në klasën IX, për blerjen e fletoreve të punës dhe materialeve mësimore.
