Marrja e vitaminës D për të shmangur ftohjen e zakonshme mund të mos jetë aq efektive sa besohej më parë.
Një analizë e re e publikuar në revistën “The Lancet”, zbuloi se suplementet me vitaminë D nuk ofruan mbrojtje statistikisht domethënëse kundër zhvillimit të infeksioneve akute të rrugëve të frymëmarrjes — pra kollës, teshtimave dhe hundëve me sekrecion që mund të përjetoni me një ftohje, shkruan burimi Health.
Sipas Qendrave për Kontrollin dhe Parandalimin e Sëmundjeve (CDC), vitamina D është suplementi i dytë më i përdorur në SHBA pas multivitaminave.
Shumë besojnë se marrja e kësaj lënde ushqyese të tretshme në yndyrë, e cila gjendet vetëm në pak ushqime dhe përthithet mirë nga dielli, është thelbësore për të parandaluar sëmundjet e zakonshme.
Historikisht, ky besim ka pasur edhe mbështetje shkencore. Për shembull, një meta-analizë e vitit 2021 e kryer nga i njëjti ekip kërkues, zbuloi një “efekt modest mbrojtës” të marrjes ditore të vitaminës D për të shmangur infeksionet e rrugëve të frymëmarrjes.
Në studimin më të fundit, studiuesit synuan të rishikonin përsëri shkencën, këtë herë duke përfshirë edhe punime të publikuara më vonë.
“Ka shumë prova që vitamina D ndikon në sistemin imunitar dhe shumë njerëz kanë nivele të ulëta të saj,” tha Carlos A. Carmago Jr., profesor i epidemiologjisë në Harvardi për revistën Health.
Carmago dhe studiuesit e tjerë shtuan gjashtë studime të reja në këtë përmbledhje sistematike dhe meta-analizë, duke e çuar numrin total të studimeve në 46 dhe të pjesëmarrësve në mbi 64,000.
Shkencëtarët shqyrtuan nëse njerëzit që merrnin vitaminë D kishin më pak gjasa të merrnin infeksione akute të frymëmarrjes krahasuar me ata që merrnin placebo, dhe nëse faktorë shtesë si mosha, doza ose nivelet ekzistuese të vitaminës D në gjak kishin ndonjë ndikim.
Më pas ata analizuan informacionin duke përdorur një metodë statistikore të quajtur modeli i efekteve të rastësishme.
Marrja e vitaminës D nuk e uli në mënyrë domethënëse mundësinë e njerëzve për të marrë ftohje, pavarësisht moshës, dozës apo niveleve ekzistuese të vitaminës D në trup. (Për fat të mirë, megjithatë, vitamina D gjithashtu nuk shkaktoi më shumë efekte anësore sesa placebo).
