Pikëtakimin e lanë tek konviktet.
E nga këtu, studentët nisën marshin drejt pllatos “Shokët e Lirisë” në Gjakovë.
Kështu të martën, Iniciativa Studentore “Fehmi Agani” organizoi një protestë paqësore.
Krejt kjo, sipas tyre, kundër padrejtësive që po ndodhin me gjyqin ndaj katërshes së UÇK-së që ndodhën për gjykim në Hagë.
Organizatorët thonë, se studentët e Gjakovës, nuk do të ndalen me kaq.
“Unë iu them nga këtu që nuk do të ndalemi vetëm më këtë protestë, do të bëjmë protesta edhe më të mëdha derisa ata të vijnë në vendin e tyre. Për mua si bijë e këtij vendi, përderisa kjo gjykatë bën këso padrejtësi, është gjykatë e shk*ve”, tha njëra nga organizatoret e protestës.
Studentët u përkrahën edhe nga disa deputetë të rinj të Kuvendit të Kosovës.
“Ky është një mesazh i fuqishëm që tregon se Kosova dhe populli i saj i kërkon liderët e saj që kanë qenë shpresa më e madhe gjatë një periudha shumë të vështirë për Kosovën”, tha Sala Jashari.
Në këtë protestë u panë edhe ata, që dikur ia kthyen pushkën shtetit serb.
“Edhe pse ishte një masë simbolike, por rëndësinë e saj, qëllimin e kanë pasur shumë të qartë. Besoj që ky zë do të përcillet edhe më larg, atje ku duhet të arrijë ky mesazh, që lufta e UCK ka qenë e drejtë dhe liderët që kanë duke u gjykuar, besojmë në pafajësinë e tyre”, tha Xhevahir Geci, ish – komandat i UÇK-së.
Pjesëmarrës në këtë protestë, ishin edhe nga shoqata në Gjakovë që merren me dokumentimin e krimeve të luftës në Kosovë.
“Ne si shoqatë i përkrahim si gjithmonë aty ku është liria dhe çlirimtaret, sepse ne si shoqatë i kundërshtojmë akuzat e rrejshme të Hagës dhe ne merremi me krimet që Serbia i ka bërë këtu në Kosovë”, tha Shkëndije Hoda.
Ndryshe, së fundmi Dhomat e Specializuara bën të ditur se në rastin “Thaci dhe të tjerët” deklaratat përmbyllëse do të jepen në muajin shkurtë të vitit të ardhshëm.
E disa muaj me vonë, edhe shpallja e aktgjykimit.
