Studentë dhe qytetarë kanë mbërritur në Beograd që herët në mëngjes, në një protestë të madhe nën sloganin “15 për 15” që po mbahet sot në Beograd për 15 viktimat e incidentit në stacionin hekurudhor të Novi Sadit më 1 nëntor 2024.
Protestuesit ecin në këmbë, ndërsa shoferët i përshëndesin me bori dhe dëgjohen sirenat. Nisjet e shumta të autobusëve ndër-urbanë drejt kryeqytetit janë anuluar, raporton Danas.
Presidenti serb, Aleksandar Vuçiq, mbrëmë në një paraqitje për publikun tha se kushdo që shkakton trazira arrestohet.
Protestat në Serbi kanë nisur nga nëntori i vitit të kaluar, kur 15 persona u vranë nga shembja e një tende në stacionin e trenit në Novi Sad. Studentët dhe qytetarët kërkojnë llogari nga autoritetet serbe për atë që ata thonë se është korrupsioni i përhapur dhe lidhja mes krimit dhe shtetit që çoi në tragjedi.
