Sipas tij ikja e qytetarëve nga Kosova në pesë vitet e fundit është alarmante.
Stavileci tha se ikja e qytetarëve ka disa shpjegime edhe një fajtor.
“Këta numra të zi kanë disa shpjegime dhe një fajtor. Humbje shprese dhe zhgënjim. Dëshpërim ndaj një qeverisjeje që mashtroi mendje dhe korruptoi ndjenja. Irritim për indiferencën e paskrupull ndaj halleve të qytetarëve. E, fajtori është ai që irritimin, dëshpërimin dhe zhgënjimin, i bëri bashkë për ta çrrënjosë shpresën. Mbase paqëllimshëm, por vetëdijshëm sigurisht”, ka shkruar Stavileci.
Ai theksoi se rritjet e çmimeve të ushqimit, derivateve dhe energjisë e shumë probleme të tjera po ndikojnë në jetën e qytetarëve të Kosovës, shkruan teve1.info
“Rritjet e pakontrolluara të çmimeve të ushqimit, derivateve dhe energjisë, mungesa e pakove ekonomike stimuluese dhe e masave lehtësuese, dështimi për të realizuar investime kapitale dhe për të hapur vende të reja të punës, padrejtësitë dhe pabarazitë sociale, izolimi, si dhe problemet e tjera të shumta po ndikojnë që mijëra qytetarëve, edhe ashtu të lënduar, t’u vritet shpresa për një të ardhme më të mirë në vendin e tyre”, ka shkruar në Facebook Stavileci.
Sipas tij, fronti i kësaj qeverie do duhet të ishin kriza ekonomike, energjetike dhe kriza e çmimeve astronomike e jo qytetarët, mësimdhënësit, mjekët, bizneset, sindikatat e as veteranët, duke shtuar se kjo është fatkeqësia më e madhe që po i ndodhë vendit.
“Fronti i kësaj qeverie nuk do të duhej të ishin as qytetarët, as mësimdhënësit, as mjekët, as bizneset, as sindikatat, as veteranët, por do të duhej të ishin kriza ekonomike, kriza energjetike dhe kriza e çmimeve astronomike. Kjo është fatkeqësia më e madhe që po i ndodhë vendit tonë aktualisht. Më e madhe se kriza ekonomike dhe më e rrezikshme se situata pandemike. Me ata me të cilët do të mund të krijohej fronti i luftës po krijohet fronti i ikjes, ata me të cilët do të luftoheshin këto kriza janë nga të parët që po e lëshojnë vendin apo po i plotësojnë listat e radhët për ta lëshuar atë”, ka thënë ai.
Stavileci tha se kjo gjendje është urgjencë e cila kërkon reagim urgjent.
“Kjo gjendje është urgjencë, prandaj kërkon reagim urgjent. Kërkon vizion për zgjidhje, guxim për ndërhyrje dhe dije e kompetencë për vendime e veprime. Ndryshe, vitin 2022 do ta përfundojmë me një rekord të ri edhe më të zi të largimit të qytetarëve nga vendi ynë”, shtoi ai.
